Daɗndu otooji hakkunde Orop e Afrik, anndiraandu Pari-Dakar (Lisbone Dakar), eɗen ciftora waɗaano hikka sabu laamu leydi Farayse wasiyaade yuɓɓinoobe ɓee yowde kewu oo. Ɗum ko caggal nde tuubakooɓe nayo pellaa saraaji Eeleega. Muritani mettiniino heen no feewi, sibu yuɓɓinooɓe kewu o kam en ina keɓinoo waɗde mo caggal nde laamu Muritani gaddanii ɓe kisal, tay’i ko ina abboo e 2 000 jogitiido ngam reende lappolngol so rewii e Muritani. Haa hannde niien ndonkii faamde ko addani laamu Farayse wasiyaade ɗum, sibu, Muritani ɓuri leydekeewde tacceteede heewde kisal: yo won Maruk, yo won Mali.
Mo wuuri ɗum noon, daɗndu nduu waɗoyta ko Amerik worgo, tuggi 3 haa 18 saawiyee 2008 hakkunde Arsantiin e Sili. Hol ko waɗi ngol eggugol yaawirde nii ? Ena laaɓi won ko en kaalanaaka sabu so daɗndo hikka haaytii e lewru siilo, eggaama e lewru colte, eɗen poti naamnaade hol no ɗum wonirta so wonaa ko ko eɓɓanoo ko ɓooyi ? Mbele ko Amerik Latiin ɓuri Afrik hisde ? Ɗoon kadi ena noddi yuurnannde luggere sabu ko oon diiwaan ɓuri heewde ɗo Oropnaaɓe njaggetee, ena ndahee walla ena mbaree. So en njuurnitiima, en paamat ma a taw won goɗɗum suuɗii caggal eggugol Pari-Dakaar, ko wonaa tan kisal reegnooɓe e kaɓirɗe mum en.
Haa jooni haɗaani won weltiiɓe e oo kabaaru sabu, e jiyle maɓɓe ngoo daɗndo addaani e Afrik so wonaa diiraali ɓolɓoti e maayde sukaaɓe fereteeɓe sahaa kala ! So ɗum yawtii, alaa nafoore nde ɓe njiyi e yah-ngartaa werlaaji hakkunde Orop e Afrik. Ena laaɓi tan, ngol eggugol ena jari haaleede sabu Pari-Dakaar dañii ko ena abboo e duuɓi capanɗe tati hikka.
Ko woni heen goonga kala, diwataa ko daɗndo lollunoongo, addannongo leyɗeele keewɗe haaleede jamma e ñalwama e teleeji winndere ndee kala.
