Hono Saalabi wiyi “Saam wuurii duuɓi teemedde jeegom, ngam annabi Nuuhu ñaagani-maa mo yo geno hokku mo wuurde haa o ñaagano hoore makko geno maayde. Waɗde nde o yahi haa o mawni o fuɗɗii tampude, ko ndeen o ñaagii joom makko maayde. Geno jaabii ɗuum, ko ndeen o maayi, o ubbaa ko wuro ina wiyee Niinawaa. Hono Wahaab bun man-mbahi wiyi “annabi Nuuhu wuurii caggal ɗuufaan duuɓi teemedde tati, refti heen ko o hajjoyi, ɗuum ko nde o yalti laana kaa.” Hono Wahab bun man mbahi wiyi “nde annaabi Nuuhu nelaa e leñol mum ndee tawi o heɓii duuɓi teemedde ɗiɗi e capanɗe joy (250), o wuurdi e maɓɓe duuɓi ujunere ŋakkuɗi capanɗe joy, ɗum firti ko duuɓi teemedde jeenay e capanɗe joy (950) fawaadee e haala geno e nder Ɓuraana mum tedduɗo. Nde yahi haa Nuuhu timmini ko geno hokkunoo ɗum e nguurndam, Maleyka maayde ari he makko wiyi mo “kisal yo won e maa aan Nuuhu”. Nuuhu salmitii wiyi “aan ne yo kisal won e maa, holi aan ?” O wiyi “ko miin maleyka maayde, ngaran-mi ko ƴeftude fiɗtaandu maa.” Yeeso annabi Nuuhu ñirɓinii, maleyka maayde wiyi mo “ko ngoo yeeso woni aan Nuuhu ? Mate a haaɓataa nguurndam etee ko aan ɓuri yimɓe fof juutde nguurndam ?” Nuuhu heɓɓitii wiyi “waɗi noon ko mi tawii aduna ko damuɗe ɗiɗi waɗi, mi naatirii heen ngootal, mi yaltirii goɗngal”. Refti heen ko Maleyka maayde weeɗi mo kaas njaram ummiɗam to aljanna o wiyi mo yo o yar. Ɗo o woni e yarde ɗoo tan, haa o diftii fiɗtaandu mo jam e kisal ngoni e mum. Nde o maayi ɓiɓɓe makko kebli kasanka makko, ɓe kasni mo, ɓe ngubboyi mo to nokku ina wiyee Kurki. Wiyaama ina tawee ɗoon yanaande makko ɗoo sewnde ndiyam.
Banndiraaɓe tedduɓe ko ɗoo daartol annabi Nuuhu (JKM) oo haaɗi.
Jibril Muusaa Jooɓ
