Ɗanngal balɗe 500 feewde hoodere Jaayre, tawi ko ɗo gootel
Ɗanngal ɗo gootel, ina wona ? Ko ɗum dey woni ko annduɓe mijii waɗde ngam yahde to hoodere Jaayre (tagofeere wiyeteende “mars”, walla “Mbaañ” ɓurnde tagopeeje ɗe kala nanndude e leydi. Yimɓe njeegomo, maa uddo e nder kees mawɗo saraaji Mosku, ɓee ngona toon lebbi 18 , wona e ƴeeweede hol no ɓee mbayata, to bannge cellal e ganndal. Ngal ɗoo gollal inniraa ko “ Mars 500 ”.
Yakaare mawnde ina fawaa heen to bannge ganndal. Ɗum ɗoo noon ko ngam heblanaade neldude yimɓe to hooere Jaayre, nde tawnoo ko ɗanngal juutngal, annduɓe miijii hoolkisaade tawo, haa ngannda no ɗum wayata e ɓalli dannotooɓe ɓee, e hoolkisaade kadi karallagal kuutorteengal ngal.
Ɗanngal feewde Mars ko hedde balɗe 520, balɗe 250 jahol e 250 gartol. Yuɓɓinta ngoo ɗoo jarribo ko Duɗal Riisi paatungal e geɗe cellal e nguurndam to Mosku e ballondiral e Gollorɗe Orop ko fayti e weeyo kam e Njuɓɓudi toppitiindi geɗe Weeyo to leydi Siin. Yahooɓe e ngaI ɗoo ɗanngal ɗo gootel ko njeegomo : Riis en tato, oropnaaɓe ɗiɗo, sinuwaa gooto. Ɓe cuɓtaa ko e nder 257 neɗɗo. Duuɓi maɓɓe ko hakkunde 26 e 34 hitaande. Kamɓe fof ko hakkunde aasiñoor e cafroowo. Hade maɓɓe yettaade ɗo, ɓe korooma banngeeji kala, haa arti noon cellal e deeƴre hakkille.
