JOOkLI CEERGAL
- yo won gorko kellifaaɗo seerana hoore mum, ngam konngol nulaaɗo Alla (JKM) “ ceergal woodani ko bakkatooɗo koyngal » humpiti ɗum ko Ibnu maajah e Daaru quɗniyyu.
Ceergal mo hakkilaani e mo suwaa hellifeede e baawnaaɗo sellataa, ngam konngol nulaaɗo (JKM) “ tato mbinndantaake bakkaat : ɗaaniiɗo haa fina, suka haa hellifee, kaangaaɗo haa sella » e konngol makko kadi “ geɗe tati leñol am winndantaake heen bakkaat: juumre, jejjitte, e waawnere ». Humpiti ɗum ko Ɗabaraanii.
- yo won debbo makko mo o resi dewgal cellungal. Ngam konndol nulaaɗo (JKM) “ woodanaani neɗɗo takkande ko jeyaa walla rimɗinde mo halfaani, walla seerde mo resaani ». humpiti ɗum ko Termesiyyu.
- 3. yo won e nonngol laaɓgngol walla coowangol ngol ina tinndina ceergal. Waɗi noon anniya ɓolo mo wonndaani e konngol walla gollal yonataa, ngam konngol nulaaɗo (JKM) “ Alla yaafiima leñol am ko ɓe miijii e ɓerɗe maɓɓe, ɗoon ɗo ɓe kaalaani walla ɓe ngollaani ɗum » hadiis kawraaɗo
PECCE CEERGAL
Ceergal ina feccoo e pecce garooje ɗee:
1. Ceergal sunna
Ngaal woni seerde debbo e sahaa laaɓal mum ngal ɓe lelodaaki heen, tawa ko ceergal gootal, yeru wiyde “mi seerii ma ! » ngam konngol Alla toowɗo oo to simoore ceergal : » Ee hey Annabi, so on njiɗii seerde rewɓe, ceeree ɓe e edda maɓɓe ” (laaɓal maɓɓe). Simoore ceergal, aaye:1
2. Ceergal bidaa
Ngaal woni seerde debbo nder fiilayru walla tuma nde o wondi e ƴiiƴam ɓesngu walla e nder laaɓal ngal ɓe memondiri maa seerde mo ceerle tati e konngol gootol, walla e nder konnguɗi tati e sahaa gooto. Yeru: “ mi seerii ma, mi seerii ma, mi seerii ma. »
Daaliilu mum ko yamiroore nulaaɗo Alla (JKM): yamiriino Abdullaahi Ibnu Umar yo rutto e joom suudu mo o seernoo e nder fiilayru, haa nde laaɓi fof, fiiltoo kadi goɗngol haa laaɓa. So o yiɗii o jogitoo mo, walla o seera mo gila o memaani mo.
Nulaaɗo Alla kadi fawi heen : “ ko ɗuum woni edda mo Alla yamiri yo rewɓe ceere heen ”. Humpiti ɗum ko Muslim. Ngam konngol nulaaɗo Alla (JKM), wiyiino nde habraa gorko gooto seeri debbo mum laabi tati e konngol gootol. « Ee bone mbele Alla ina fijiree, miɗo wuuri tawo ». Nde o haalata ɗum ndee tikkere mawnde feeñii e makko. Humpiti hadiis oo ko Nisaayi
TESKO: ceergal bidaa fof e bonde e añeede ina yana sella, hono no ceergal sunna nii.
3. Ceergal taƴngal (Baayin)
Ngaal woni ngal gorko seerata joom suudu mum tawa o waawataa ruttaade e makko so wonaa o ƴamta mo wondude e teŋe kese e kumal kesal, tee kaŋko e ƴamooɓe fof poti. So debbo oo yiɗii mo, ɓe nduttondira, so o yiɗtaani, o yaha laawol makko.
Ceergal baayin ina yana e jeese joy (5) yeru:
a. nde o seerata debbo makko gootal walla ɗiɗi o woppa ɗum haa edda mum joofa, ngaal ko taƴngal tuma nde joofi. Ngal wiyetee ko baayin tokooso.
b. ceergal ɓoorgu, ngaal woni nde debbo tottitta gorko mum huunde e jawdi ngam o seera ɗum e dow nanondiral maɓɓe.
ɓ. so ɓe ceerii to ñaawirde walla to jamaa caggal anndeede seertude ɓe ɓuri moƴƴude caggal lor.
c. so debbo e gorko ceerii ko adii naatdiigu (lelodaade), o eddintaako, ngaal ko taƴngal ɗoon e ɗoon.
d. ceergal lummbungal ngaal woni taƴngal ɓoggi ngal gorko seerii debbo ceerle tati, foti ko konngol gootol walla ko konnguɗi ceertuɗi e joofnde wootere walla o seeri mo laawol tataɓol caggal ceerle ɗiɗi ɓennuɗe.
Ɗee jeese fof so mbaɗii hakkunde maɓɓe, ngaal ɗoo ko baayin mawɗo, tawde gorko waawataa ƴamtude ɗoon e ɗoon, walla caggal edda taƴii, dagtotaako so wonaa gorko goɗɗo ɓiloo ɗoon.
CEERGAL DUTTAL
Ceergal duttal : ngal woni ceergal ngal gorko seerata debbo mum ceergal gootal walla ɗiɗi tawa o mo waawi ruttaade e debbo oo ko aldaa e humteede, hay so debbo o welaaka, ngam konngol Alla toowɗo oo « worɓe maɓɓe ɓuri haandude e ruttaade e maɓɓe, so ɓe njiɗii moƴƴitinde » Simoore nagge, aaye: 228
E ngam konngol nulaaɗo Alla (JKM) wiynoo Ibnu Umaar tuma nde seeri cuddiiɗo mum « ruttu mo e suudu makko ”. Humpiti ɗum ko Muslim.
Ceeraaɗo ngaal ceergal ina woodani ɗum nguura hono debbo desaaɗo nii. Duttagol yonii noon e wiyde “ mi ruttiima e suudu ma ». Ina yiɗaa noon nde o seednata seedeeji ɗiɗi nuunɗuɗi.
CEERGAL LAAƁTUNGAL
Ngaal woni ngal soklaani anniya laɓɓitinde ko wayi no wiyde debbo : “ aan ko a ceeraaɗo » walla “mi seerii ma” e ko nanndi heen, e so tawii ko gannduɗo soklaani naamnditaade.
CEERGAL COOWANGAL
Ngaal woni coklungal laɓɓitineede, ko wayi no wiyde : « hoot galle mon », “ yaltu galle am »… “ hoto haaldu e am », e ko nanndi heen.
Yeru, ɗii ɗoo konnguɗi wonataa ceergal so wonaa o innu ɗum. Nulaaɗo Alla (JKM) seerdiino noon gooto e suddiiɓe mum biyeteeɗo Bintul juuyni. O wiyi ɗum “ faatu to koreeji ma. » Jaŋtoore hawraade.
CEERGAL CIYNANGAL E JOWANGAL
Ngaal woni ngal debbo ina seeree ɗoon e ɗoon. Yeru wiyde debbo mum “ aan ko a ceeraaɗo ».
CEERGAL JOWANGAL
Ngaal woni pawangal e dow waɗde huunde walla woppude ɗum. Ngaal yanataa so wonaa ɗo fawaa ɗoo yan, yeru wiyde “so a yaltii galle oo, mi seerii ma » e ko nanndi heen.
CEERGAL CUƁNANGAL
Ngaal woni wiyde debbo mum “ suɓo seerde e am, walla wondude e am ». Ko debbo oo suɓii heen fof sellii. Fawaade noon e nulaaɗo (JKM) suɓniino suddiiɓe mum ngonndiigu walla ceeriigu, ɓe cuɓii ngonndiigu. Simoore pelle, Ahjjaab, maande: 28 e 29 CEERGAL JEYNANGAL Ngaal woni wiyde joom suudu mum “ mi jeynii ma fiyakuuji ma ”. walla “ fiyakuuji maa nani e junngo ma ”. so debbo oo jaabiima, « ndeen noon mi seerii hoore am ”, ceergal ngal yanii.
Jibril Muusaa Joop
