Ñalnde aset 19 mee 2012, kippu bal biyeteeɗo “ Chelse” (Kippu Angalteernaajo) nawii raay kawgel bal champion’s league (Ligue des Champions e ɗemngal Farayse). Kо Dijiyee Dorogba, pettobal Koddiwaarnaajo jeyi wune oo, sibu ko kanko naatni bit gaddando kippu makko heɓtaade Bayern (kippu Almaañnaajo), o naatni kadi bit caabiiɗo poolgu oo.
E ñalawma hannde oo, Dijiyee Dorogba ko hoodere e oo fannu. E nder ɗii duuɓi sappo (10) cakkitiiɗi o heɓii manooje kala, o heɓii kadi tiitooɗe keewɗe. Kippu mo o woni oo nawii raay laabi jeenay e nder leydi Angalteer. Kanko e hoore makko о waɗaama Bal Kaŋŋe (pettoowo ɓurɗo waawde) wonande Afrik (2006 e 2009), rajo BBC fiiliimo lefol » pettoowo bal afriknaajo ɓurɗo waawde » (2009). E hitaande 2004 o seedtanaa ma » ɓurɗe waawde bal « to leydi Farayse. Kanko woni kadi pettobal kippu Koddiwaar ɓurɗo heewde ko wallini (laabi 49 e nder oon kippu). Ɗum noon, mbaasen juutnude haala, mbiyen tan ko o pettobal mo hono mum weeɓaani, kanko e Samuel Eto’o. Dorogba noon, ko neɗɗo jamyamo, kaɓantooɗo yo jam laato. E hitaande 2006, tawi leydi makko ina woni e wolde ɓesngu, o werliima noddaango nde yimɓe leydi makko ngoppata hare.
Ina wiyee wonde omo jeyaa e artirɓe jam e Koddiwaar. Nde Alasan Watara heɓti laamu ndee, tooɗii mo e terɗe Goomu Beldital leydi ndii. E nde koddiwaar dañi poolgu nawngu kippu mum to joofnirde Kawgel Fuku winndere, o diccii e leydi, o wiyi : “koddiwaarnnaaɓe, rewɓe e worɓe, min kollii on wonde koddiwaarnaaɓe kala ina mbaawi wuurdude, ina mbaawi darodaade darnde wootere ngam yettaade faandaare wootere. Wolde nde alaa ko firti fotaani boomde leydi mbaandi nii aldude ”.
Nde o haalata ɗum ndee, omo sawndoniri e pettobal biyeteeɗo Tuure oo, kam e Bokaa e Bari (Ginenaajo). O jokki “ tiiɗno-ɗee, njoɗɗinee ɗee kaɓirɗe. Njuɓɓinee woote, ma on njiy, maa jam laato ! ” Kala nde o waɗi ko maantini, miijo makko adotoo ruttaade tawo ko e leydi makko. Yeru goɗɗo : nde kippu Koddiwaar hawi kippu Benen o wiyi “ Ko koddiwaarnaaɓe kala njeyi nguu poolgu. Ndartinee hare mon ndee, min njiɗi ko jam. Ko onon min poolani, onon fof, ɗum noon, alaa e sago jam arta e leydi men. Ma min mbaɗ kala ko min mbaawi ngam jam laattoo ”.
E lewru marse ɓennundu nduu, 22 neɗɗo aratnooɓе yeeɓde ɗo o fettata bal, maayii e aksidaa laana ndiwoowa. Caggal nde kawgel joofi, o felliti rokkude kala mbuuɗu ngu o heɓi e espoosooruuji makko, fedde topitiinde mahde cafrirɗe (opitooji) e nder leydi ndii.
Bookara Aamadu Bah
