Porkireer Manhattan, hono Cyrus Vance ɗaɓɓii, ñalnde talaata 23 ut 2011 nde denndaangal geɗe DSK yooɓtoranoo, njejjite. Nde o daɓɓi ɗum tan, ñaawoowo potnooɗo toppitaade haafeere ndee, abbitii e makko. Ɗum firti ko laamu Amerik haaytii ñaawde mo. O haaytii ñaaweede ñaawoore kuuge. Heedooɓe Nafisatu mbaɗii “appel” (noddita), kono ina yaakoraa ñaawoore toppitiinde ɗum ndee ko ko jogori riiwtude ɗuum. Firti ko DSK hankadi heɓtii wellitaare mum.
Ina jeyaa e ko saabii ndee feere : Ɓe mbiyi wonde ko Nafisatu haali koo deeƴaani e nofru, waawaa wonde, sibu semmbe makko ɗo tolnii ɗoo, DSK waawaa waɗnude mo ko o welaaka. Haa teeŋti noon, o wiyi ko DSK ko guufnuɗo mo. E oo fannu, ɗum ina waawnoo aaɓnaade so tawii oon gijorii mo ko njogitaari, ko wayi no fetel, walla paaka. Tee, guufnaaɗo kam ina waawnoo ŋatde, woppa e joom mum aanoode. Ko ko mbiyno-ɗen koo tan, ŋataani, ŋaaccaani, wullaani, ih, so wiyii ko baawnaaɗo, ina haawnii.
Ɗum fof e wayde noon, hare ndee ina jokki, sibu keedoowo Nafisatu oo, hono Kenneth Thompson, ko moolanaaɗo. Ɓayri ñaawoore kuuge ndee woppaama haa laaɓi, fayaa ko e ñaawoore siwil, mbaydi geɗe ɗee wayloto. Ndeen, Nafisatu ko seede tan wonnoo, kono jooni ko kanko wullitii, ko kanko ñaawdetee, wonaa laamu. Heddii ko geɗe Kan en e Jallo en, kaawaani Bahbahɓe. Ina ñohee DSK ko Kan yettetee, walla ko ɗum nii woni e innde makko, sibu DSK firti ko Dominik Estoros Kan.
Kelmeendi
Ñaawoore siwil e ñaawoore kuuge
Gila heedooɓe Nafisatu paami wonde njogoraani dañde ko njiɗi koo to bannge ñaawoore laamu Amerik, ɓе njoɗɗini wullitaango to bannge siwil.
To Dental Amerik ñaawooje ɗiɗi ina ngoodi, no yaga e leyɗe nii, hay so tawii won ɗo ɗe ceerti seeɗa : ñaawoore kuuge e ñaawoore siwil. Naawooje ɗiɗi ɗee, to Amerik, njokkondiraani hay dara.
Wonande hafeere DSK ndee, fuɗɗii toppitaade ñaawoore kuuge ndee ko poliseeji, caggal nde Nafisatu wullitii toon. Ko laamu e hoore mum daranii ɗoo yiylaade goonga e fawde kuugal e tooñɗo oo.
Naawoore siwil noon, ko hakkunde neɗɗo e neɗɗo (walla kam banngeeji ɗiɗi, di naworaani laamu). Heewi yuumtude ko e maslahaa hakkunde banngeeji ɗiɗi ɗii, yeru, mo tooñannge jaaldi e hoore mum oo wiyee ko rokku oya ndaamordi. Kono tan ñaawoore siwil waawaa waɗde ɗoon ɗo ñaawoore kuuge ndee joofaani, walla woppaaka. No nde joofiri fof, haɗataa neɗɗo cikkudo ko tooñaado oo yiylaade ñaawoore siwil. Neɗɗo ina waawi labbineede to ñaawoore kuuge, kono fawee alamaan to ñaawoore siwil. Ko ɗoon Farayse seertiri e Amerik, sibu to Farayse, so a labbinaama to bannge ñaawoore kuuge (laamu jogii ɗum ɗoo kadi) a waawaa faweede kuugal (alamaan) to ñaawoore siwil.
- Carɗoowo (Majistaraa) ko kala neɗɗo gollotooɗo e ñaawoore, mo nganndu-ɗaa woni golle mum ko ñaawde walla rewnude laawol walla ɗaɓɓude ɗum e innde laamu.
- Porkireer Ndenndaandi ko carɗo jooɗaniiɗo laamu. Omo jogii sukkuɓe (substituts). Ɓeen ne ko sarɓe (sarɗooɓe).
- Appel (wullitaango ñaawoore) ko wullitaango ngo faandaare mum woni waylude walla ittude (niilnude) ñaawoore adannde, tayanoonde.
Bookara Aamadu Bah
