Duɗal ngal woni ko e legal Gurel Saŋe sara leegal Madiina, to rawda Ceerno Murtadaa Soh, caŋkiiɗo ñalnde 21/01/15, (Yo Alla yuurmo mo, yaafoomo). Duɗal ngal sosaa ko ñalnde 22 suweŋ 2010, sosi ngal ko ceerno Abuu Siraaji Soh . Faandaare duɗal ngal ko jannginde deftere Alla ndee, nehde sukaaɓe ɓee e sunna nulaaɗo Alla, mo jam e kisal ngoni e mum (JKM)…
Duɗal ngal woni ko e legal Gurel Saŋe sara leegal Madiina, to rawda Ceerno Murtadaa Soh, caŋkiiɗo ñalnde 21/01/15, (Yo Alla yuurmo mo, yaafoomo). Ngal sosaa ko ñalnde 22 suweŋ 2010, sosi ngal ko ceerno Abuu Siraaji Soh . Faandaare duɗal ngal ko jannginde deftere Alla ndee, nehde sukaaɓe ɓee e sunna nulaaɗo Alla, mo jam e kisal ngoni e mum (JKM).
Ceerno Abuu Siraaji Soh kadi ardii njuɓɓudi duɗal ngal, keeroriingal jaŋde deftere Alla ndee. Ina teskaa e duɗal ngal jogaade mbaadi njanngiin keso, walla mbiyen njuɓɓudi jaŋde kesiri, ko ɗum waɗi e yettere Alla, ko ngal duɗal nootangal no feewi, haa teeŋti noon e sukaaɓe rewɓe. A ngal jogii hedde teemedde ɗiɗi e capanɗe nayi e goo almuudo 241 (heen 70% ko sukaaɓe rewɓe).
Ine teskaa e sukaaɓe rewɓe duɗal ngal jogaade ɓoornateeri moƴƴiri e waawde huñaade Ɓuraana e wowlude e ɗemngal arab. Yoga e kiirɗeeli baɗateeɗi e Kayhayɗi, sukaaɓe rewɓe ɓee ina kollira heen mbaawka mumen, huunde hesere e nder Fuuta, nde tawnnoo, ɓurnoo waawde janngineede tan ko sukaaɓe worɓe. Eɗen nganndi diine nawori ko eddaaji ɗii fof, ɗum noon aadee kala ina foti anndude deftere Alla ndee, waawa ɗemngal Arab, mbele ina huɓindoo tigi rigi yamiroore Geno.
Huufi Duɗal ngal ko fedde (Fondation) Hadaiqal Ɓuraana, sosaande ñalnde 13 lewru ut (juko) 2015. E seernaaɓe jannginooɓe e duɗal hee, heen njeenayo ko rewɓe, heen ɗiɗo ko worɓe. Ko duɗal ngal sosaa koo, 37 almuudo njoofnii Ɓuraana, heen njoyo (5) ko worɓe, heen rewɓe ɗiɗo e gorko gooto ina ndeeni.
Duɗal ngal waɗi ko doge tati : Rogere 1 Muraajatu kubraa (deftagol mawngol) ɗum woni, almuudo reftoo ko ɓenni, ko janngi fotde lewru haa ko ɓuri ɗum. Rogere 2 ko Darsul Yawmi (winndannde hannde), ɗum woni winndannde hesere. Rogere 3 Muraajatu Sugraa (deftagol tokosol) ɗum woni almuudo reftoo ko janngi e yontere ɓennunde ndee. Rogere 4 Darsul Gad (winndannde janngo). Kala rogere ina dottanaa dumunna. Rogere 1 ko 45 hojom, Rogere 2 ko 45 hojom, Rogere 3 ko 30 hojom, Rogere 4 ko 60 hojom.
Ñalɗi janngateeɗi, tuggude hoore biir haa njeslaare, subaka ko waktuuji 3 tuggude njontu 7ɓo haa njontu 10ɓo, waktuuji 3 kikiiɗe, tuggude njontu 16ɓo haa njontu 18ɓo.
To bannge fedde ndee, kala 30 lewru eɓe njooɗoo. Taaɓannde maɓɓe adannde ko keptingol, ina wayi no ɗum heɓaama, taaɓannde ɗimmere ko mahde caali, e ooɗo sahaa caali mawki mahaama, ko heen sukaaɓe njanngata, e ballal sukaaɓe kayhayɗinaaɓe wonɓe ɗoo e caggal leydi. Taaɓannde tataɓiire ndee ko mahdi keblorɗe, ɓe ngudditii catal to leegal Tulde. Fedde ndee soodii kaɓirɗe njuɓɓinirɗe kiirɗeeli jooɗorɗe, leece ekn. Wuurni duɗal ngal ko Alla e ballal jinnaaɓe sukaaɓe janngooɓe, fedde ndee wuuri ko e piye e balle heeriiɓe.
A nde jotondiri e pelle keewɗe : Fedde Ɓamtaare Pulaar Catal Kayhayɗi, Heblo Sukaaɓe Afrik, Jamiya Ahahmadiya to galle Ceerno Aamadu Neene Bah e denndaangal duɗe gonɗe ɗoo e Kayhayɗi, e yimɓe teelɗuɓe. Usmaan Kamara gonɗo to Farayse waɗanii duɗal ngal robine, leegal ngal fof ina naftoroo ndiyam ɗam, o soodii looɗe e catallaaji. kala hitaande duɗal ina heɓa almuɓɓe 10 joofnuɓe ɓe mbaɗanee hiirde deftagol hakkunde juulde koorka e juulde taaske, heewi suɓeede ko ñalawma alkamiisa.
Seeremɓe mawɓe ina keptini golle duɗal ngal, ko wayi no Ceerno Mammadu Cerrno Ahmadu Neene, Ceerno Moktaar Kebe, Ceerno Demmba Raki Aan, Ceerno Abdullaay Mammadu Lih ɓurɗo lollirɗo Abdullaay Sammba Baaba e seernaaɓe woɗɓe. Laamu heɓtinii Duɗal e feebriye 2016.
Fannuuji nayi ina njanngee e duɗal ngal : Ɓuraana, Pulaar, Arab, Sariya. En teskiima mbindiin ina njannginee wonande fuɗɗotooɓe. Ko ɓuri heewde e sukaaɓe janngooɓe ɓee ina jannga e duɗe laamu.
Eɗen poti daranaade ko wayi no ɗeeɗoo duɗe ɗe yimɓe laaɓaa faayiida mumen. Alaa ko ɓuri janngude Ɓuraanna moƴƴude, ina nafa e aduna ina nafa e laakara. Ko tagi eɗen mbaawi yoɓde lewru ujunnaaji jeetati haa sappo, haa ɓura, wonande almuudo janngoowo duɗe keeriiɗe (piriwee), almuudo janngoowo Ɓuraana alarba kala wiyee yoo yoɓ noogaas. Ceerno jannginoowo Ɓuraana ko neɗɗo, omo jogii soklaaji aduna, omo foti ñaamde, yarde, holtude, safraade, jogaade ɓesngu… Ɗeeɗoo duɗe ina poti walleede mbele ina ƴellitoo.
Kala jiɗɗo jokkondirde e duɗal ngal, ina waawi noddude Ceerno Abuu Siraaji Soh Hooreejo Duɗal ngal e fedde ndee, telefoŋ 41 00 43 68 walla kalfinaaɗo jokkondiral hono Ceerno Jah 48 55 82 95.
Usmaan Ñaan, hooreejo catal FƁPM to Kayhayɗi
