Tonuuji sappo leɗɗe safaara ñemtinaaɗe nduppaama altine tati 3 mars to PK 23 laawol Nuwaasoot fayde Butimilimiit. Koolaaɗo kuuɓal jaagorɗo cellal ina tawtoraa ɗuum, yantude e ardiiɓe tunndu ɓaad Naaga. Ko ngol woni laawol joyaɓol ko leɗɗe bayɗe nii ina nduppee. Hannde o Jaagorɗo cellal ko ko ummanii haɓde e njeeygu safaara ñemtinaaɗo kam e safaruuji buntuɗi sabu mum waasde mooftireede no fotiri. Ina wayi nokkuuji keewɗi ina ngollodoo e ɗuum. Ina teskaa wonde ko ɗum fuɗɗaa ko, leɗɗe ñemtinaaɗe walla buntuɗe ustiima. Ina jeyaa e ko ɓeydi ɗum kulɓingol somotooɓe ɗeen leɗɗe ina naatna e leydi he.
Gardiiɗo biro duwaan Nuwaasoot hollitii wonde ɗeeɗoo leɗɗe nanngaa ko kanndaa Nuwaasoot ina ummorii Afrik hirnaange. Ko ɗoon, caggal nde ɓe cikkitii, ɓe neldi heen huunde to ardorde farmasiiji, ɓeen ngoonɗini wonde ko ɗum leɗɗe ñemmbaaɗe. Ko ɗum addanta yimɓe ɓe wasiyeede, so ina cooda leɗɗe yo njahat nokkuuji baɗiraaɗi ɗuum, ganndaaɗi, tee koolkisoo hade mum en fuɗɗaade safraade. Ko duppaa e leɗɗe ñemmbaaɗe e ɗɗiiɗoo lebbi tati, yettiima tonuuji 38.
Ƴoogirde : Ami
