Ko ñalnde altine 10/09/2007 (27 lewru yaawa) hakkunde tuusubar e takkusaan, e nder galle Duudu Bah Elmina Nuwaasot, Tafsiiru Aamadu Tijjaani Bah ruttii e joomum caggal lelnde juutnde tawi saabii ɗum ko kelal koyngal ñaamal to Baabaaɓe gila e nder lewru jeegobiiru 2007. Gooski makko ummii Nuwaasot feewde Baabaaɓe ko ñalnde altini 10/09/2007 waktu 23h30. O lootaa ko e nder galle makko Baabaaɓe, o juula ko to hoɗorde ceerno Mohamed el Haadi Bah, tawi kadi ko oon juulni dental ngal ñalnde talaata 11/09/2007 e waktu 11h40.
O wirna ko e nder galle makko bannge rewo baaba makko ceerno Njaay e mawniiko Umaar ceerno, tawi waktu tolniima e midi (12h). Tawtoraama wirwirnde nde dental mawngal ummoriingal e kala banngeeji. Jeewte keewɗe njuɓɓinaama e nokku hee, ngam hollirde golle jiyaaɗo Alla o, e waajaade juulɓe ɓe. Ina jeyaa e ɓurɓe juutnaade e jeewte ɗe seernaaɓe men : Alasan Baro lollirɗo Abuu Suufiyaan, Aamadu Yero Kiiɗe e Ɗaahaa Dukkee. To bannge ɓesngu, Tafsiiru Aamadu Tijjaan woppi ko ɓiɗɗo gooto ina wiyee Umaar ; omo yahra e duuɓi 19 hikka. Tafsiiru Aamadu Tijjaan lomtiima e kalifaagal ngal ko ina tolnoo e duuɓi sappo e joy (15) tuggude 1992 caggal duttagol e joomum mawniko Umaar Ceerno, haa sappo lewru jeenaɓiiru 2007 (10/09/2007), ñalawma mo o ruttii e joomiiko.
Tafsiiru Aamadu Tijjaan wuurii duuɓi cappanɗe jeenay e tati (93) tuggi 1914 haa 2007. Dumunna nguurndam makko e dumunna nguurndam baaba makko Ceerno Njaay Bun Umaar Bah poti. Kamɓe ɗiɗo fof ɓe nguurii duuɓi cappanɗe jeenay e tati (93). ɓaktu mo Tafsiiru Aamadu Tijjaan jibinaa o, ko ndeen haayre mahgol Jumaa Baabaaɓe aafa. Ko ndeen kadi Ceerno Njaay wallifii deftere mum sikaaya (wullitorde ɗo Alla nde yaafato maa bakkatuuji. Lomtii mo e khalifaagal ngal ko kodda Ceerno Njaay biyateeɗo Mohamed El Haadi Bah jibinaaɗo e hitaande 1939 to Baabaaɓe.
Yo Alla yurmo Tafsiiru Aamadu Tijjaani e denndaangal maawɓe juulɓe . Yo Alla haarnuɓe Aljanna . Yo Alla wallu kalifa lomtiiɗo o, Ceerno Muhammed El Haadi e donngal roondii ngal. Yo Alla wallu kadi ɓesgnu Baabaaɓe e saraaji mum no ndewri e lomtiiɗo o, hono no ɓe ndewrunoo e Ceerno Njaay, Umaar Ceerno e Tafsiiru Aamadu Tijjaan. Aamiin.
Mammadu Bookar Lih.
Nguurndam Dental Pinal
Ceerno Njaay Dental Pinal Ceerno Njaay sosaa to Baabaaɓe ko gila 19/2/2005. Ngal hebtinaa to laamu ko ñalnde 8/6/2006 e resepise tonngoode 0160. Faandaare mayre ko haɓde e humambinnaagal, majjere e baasal. Ko ɗum tagi ende daranii ɗeeɗo golle : – jannginde Ɓuraana e sariya islaam ; – jannginde mawɓe ɓe mbaawa winndude e janngude e ɗemɗe Pulaar e Arab. – heblude sukaaɓe tolniiɓe e duuɓi tati haa duuɓi jeegom ko adii nde naatata e duɗe laamu ; – yuɓɓinde tinndinooje ngam riiwtude bidaaji e aadaaji bonɗi ; – yuɓɓinde jeewte peewtuɗe e diiwtugol majjere, humambinnaagal e baasal, rafiiji bonɗi ko wayi no Sida, pali (paludisme) e ɗoyru (tuberculose).
Tuggude nde fedde nde sosaa haa jooni, ɗeeɗoo geɗe ndaranaama : To Baabaaɓe : Duɗe Pulaar udditaama. Ko ina tolnoo e yimɓe teemedere mbinnditiima heen, tawi kamɓe fof ko ɓe rewɓe. Jannginta ɓe ko Umaar Mammadu Baal (Elimaan), Jah Binta innde, Maamuudu Alfa Jah, Sal Daawuuda Rakiyel, Aminata Sal ; Ummu Aamadu Siree Sal. Duɗe Arab udditaama, ko ina tolnoo e yimɓe capanɗe tato ina njannga heen, tawi kadi fof ko rewɓe. Jannginta ɓe ko Bookara Abdul Bah, Mariyam Siree Sal, Raamatullaay Abderrahmaan Sal.
