Kala ko neɗɗo haali e Yero Dooro Jallo ko fa’ti e yiɗde mo e daranaade leñol Fulɓe won ko heddi haa heewi. Ko annduɓe e yiɗɓe Yero kaali e mum ko tan ina yona ; so neɗɗo reenaaki tan, reftata ko ɗo rewanoo. Miin, ceedtatoo mi tan ko seeɗa e ñalɗi min ndawdunoo. Mi nanii Yero ko juuti mi yi’aani ɓum, haa nan Alla oo wonti ganndal ; sabu e hitaande 1988, to leydi Liibiyaa ngaandu-moo-mi, nganndumoo-mi no yooɗi, ngaal ganndal alaa nimsa, ko ganndal nafoore e ɓamtaare. Saabii ganndondiral ngal, ko to min njanngatnoo, to leydi Liibiyaa. Amin njoginoo toon dental Fulɓe janngooɓe arab, to leydi Liibiyaa, ene jeyaa heen Kamaruun, Niijeriya, Niijeer, Burkina, Maali, Gine, Sarliyon, Gine Bisaawo, Gammbi, Seneegal e Muritani. Mi wonaano hooreejo fedde ndee, kono ko e yiilirde he njeyanoo mi. Hono musiɗɓe men ɓiɓɓe Fulɓe janngooɓe to Misra mbinndi min ɓataake e pulaar. Jonnde noddaa, wiyaa yo ɓataake oo jannge. Ɗum gagi. Kamɓe fof ɓe kawri yo mi naw ɓataake oo, mi etoyoo janngunde mo. Naw mi ɓataake oo. E ballal Alla, njanngu mi, paam mi, taw mi ɓataake oo kadi ne wondi e defte pulaar. Ko ɗoon fedde amen ndee felliti janngude e jannginde ɗemngal ngal.Ɓe toɗɗiima kadi yo mi janngin. Ngantin mi, kono ɓe mbaawni mi. Miin ne mbakkilii mi. Miin e musiɗɗo gooto ne wiyee Aliw Bah, ne jeyaa Jolof, mbaallondirtunoo haa woɗɓe njanti heen. Caggal ɗuum, ko miin kadi yamiira yo mi jaabto ɓataaake oo, mi anndina ɓe min keɓii ɓataake e defte maɓɓe. Min kabri ɓe heen wonde min ngudditii duɗal, kono min ngalaa jannginoowo. Ko kanko Yero e ho’re mum jaabtii. O wi’i binnduɗo ooɗoo ɓattaaake oo yonii jannginoowo. Ko ɗoon binndondiral hakkunde amen fuɗɗii, gila min njiyondiraani, kono haɗaani jokkondiral ngal taYaani haa Alla itti mi ɗoon nawi mi Farayse. Ko e hitaande 1975, tuma o ari yillaade mawniiko Demmba Dooro Jallo. O nelani mi, ngar mi to makko, etee so wonaa gooto e amen fof ne nana goɗɗo oo. Ngar mi galle njaatige makko, mbeɗe naamno. Kawru mi kadi ko e makko. E salminaago he, keɓtin mi sawtu mo nanatnoo mi e Rajo Kaahira.
– Mbii mi : « mbeɗe sikki ko aan njilotoo mi.
– O wii : ina gasa.
– Ko aan woni Yero Dooro Jallo ?
– O wii : Maataw kay ! ɓonaa Jibi Umar Mbooc? » ;oon tan min maɓɓondiri. Min njeewtidi ko juuti, min njahdi, min njokkondiri e banndiraaɓe heewɓe. ;o min ngari fof ko yewtude, wasiyaade, waajaade e tinndude. E hitaande 1982, min kawriti Bordoo, ko ndeen Kawtal Janngooɓe Pulaar e ɓinndere he sosaa. Ko kanko arani Misranaaɓe, miin e Alfaa Ibraahima Soh, Mammadu Aliyyu, Mammadu Alasan Bah, min ngarani Faraysenaaɓe ; woon umminooɓe Liibiyaa, e Makka. Kanko Yero, alaa ɗo dille pulaagu meeɗi dillude, tawa o tawaaka. Min mbayri haaldude ko e lewru deesaamburu, mbeɗe noddi ngam duwaade yo Alla ittu ñawu, waaɗta cellal. O wi’i mi ko mawɗum. Kono o woppaaka, tawi o ñaagiima woto min mbayrondir. Nde wonnoo Alla haajaani yo min kaaltid, min kaaltidaani. En njaɓii golle Alla. Ñaagoto ɗen tan ko yo Alla moYYu e makko, woto caggal makko finnir leñol ngol. Yo Alla lomtinan en Yerooji keew- ɗi. Aamiin. On njaaraama.
Jibi Umar MBooc
