Ko e nder jamma alet 12/02/07, tawi ina jofi altine, kabaaru sankaare Muhammed El Haadi ɓurɗo anndireede Ceerno Haadi bayyinaa e nder winndere he, ummoraade wuro Ñooro mo Saahal. Ɗum waɗi ko lewru caggal sankaare Ceerno Muntaga Taal.
Ceerno Haadi jibinaa ko e hitaande 1920, o sankii ko omo yahra e duuɓi 87. Ko o ɓiy Aamadu Muntaga leliiɗo hannde e saalaŋeeje Ɓoggee (Muritani). Ceerno Haadi ko neɗɗo diine, giɗo Alla, giɗo yimɓe fof, muñɗo, jannginoowo, balloowo, ñamminoowo. Caggal sankaare makko, otooji keewɗi ummiima e leydi ndi (Ɓoggee, Nuwaasoot, ekn) ina njolni yimɓe heewɓe yahooɓe jaalo to Ñooro. Yo Alla yurmo mo yaafoo mo, haarna mo aljanna, kanko e maayɓe juulɓe fof. Eɗen nelda duwaawu, e innde terɗe FƁPM fof feewde e ɓesngu cankiiɗo o, e galle Taalɓe fof no diidorinoo, e Malinaaɓe fof.
