Fooyre Ɓamtaare ina duwanoo ɓesngu e yiɗɓe Soh Muhammed el Habiib, duttiiɗo e joom mum ñalnde talaata 29 desaambar 2015 to Ndakaaru, wirnoyaa to Likseyba ñalnde alkamiisa 31 desaambar 2015.
Dillooɓe hannde heewɓe e hare ɗemɗe e pinal nganndaa Soh Muhammed el Habiib. Ina gasa tawa waɗi noon ko yaltude mo leydi ndii gila e kitaale 1988-1989. Kanko Muhammed el Habiib, gaa gaa ko mawɗo Sileymaani Kan seedtii e makko koo, woɗɓe tawanooɓe ummannde adannde jaŋde e ɓamtugol Pulaar, hedde hitaande 1973, ceedtiima e makko jaambaraagal mawngal e nuunɗal timmungal.
Eɗen ñaagoo Alla nde yurmotoo mo, yaafoo mo, naatna mo Aljanna.
Abuu Aamadu Joop to Likseyba, neldii Fooyre ngalɗoo seedanfaagal garowal les ɗoo :
“Ñalnde Alkamiisa 31/12/2015, e wirwirnde Muhammed el Habiib Soh, to Likseyba Gorgol, musiɗɗo ine wiyee Aliu Maambay yettinii nelal Muhammed el Habiib Soh nelanoo kañum ne faade e leñol fulɓe to mbaawi wonde fof. Kanko Aliu Maambay o wiyi : “ñalnde talaata 22/12/2015 miɗo ari Ndakaaru salminde Muhammed el Habiib, tawi miɗo nani sellaani. Min calmondiri haa heddii miɗo hoota, o wiyi mi “Aliu, jooɗto seeɗa”. Njooɗtii-mi. O wiyi “won ko nelanoo-mi faade e fulɓe, miɗo ñaago maa nde njettinantaa-mi ɗum, haade miin ko mi dafaaɗo…” Nelal ngal ina hawnii sibu, mo o wiyi hoyɗitinii mo oo, ko maayɗo ko ɓooyi, kadi ko baaba mum mo o nelata oo. Ko haawnii heen kadi, nde o hoyɗitinaa ndee, mo o nelata oo ko Fuuta wonnoo, Alla soggi ɗum haa Ndakaaru, ari salminde mo, o siftori nelal ngal, kadi ellee omo anndi ko o jahɗo tee maa oon tawe nde o wirnetee ndee, yettina nelal ngal. O wiyi Aliu “Al Hajji Maambay hoyɗitinii kam Muhammadu : “mbiyaa fulɓe yo ngoppu tikkondiral, ngoppa ngañantumaagu, ngoppa gaybondiral, ngoppa haasidaagal so ɓe njiɗi yahrude yeeso. Kala mo woppaani ɗuum, alaa geɗal to o woni too, firti ko so maayii, alaa geɗal to laakara too, e wiyde Aliu Maambaye, nder genaale Likseyba e tawtoreede denndaangal arnooɓe hawrude e wirwirnde Muhammed el Habiib Soh. Yo Yurmeende Alla won e makko kanko e maayɓe juulɓe kala.”
