Heblo jannginooɓe
Ɗum fof noon ko e eɓɓaande nde fedde wiyeteende Caritas waɗdi e Fedde Ɓamtaare Pulaar e Muritani, ngam jannginde 200 debbo (rewɓe mawɓe) e 60 suka debbo, fotɓe fecciteede e nder duɗe 10 ngam ɓoorde ɓe humambinnaagu. Ɗum noon ko jaŋde yahdinaande e golle njeñu, woni jaŋde waawnde wallitɓe ɓe e golle ɓe ngollotoo ngam moƴƴitinde nguurndam maɓɓe.
Nii woni, Fedde ndee, ko adii ɗii ñalɗi, waɗii ko ina wona lewru to leegal Daar Nayiim too ngam suɓtaade fotɓe janngineede ɓee. Caggal ɗuum, nde suɓtii jannginooɓe 10, (Jannginooɓe Arab 3 e jannginooɓe Pulaar 7). Ko ɓeen jannginooɓe kebletee e ɗiiɗoo ñalɗi. Huufi golle ɗee to bannge Fedde ndee ko ɓee ɗoo : Aamadu Umar Jah (Hooreejo Fedde), Abdullaay Muusaa Sal (Kalfinaaɗo jaŋde FƁPM), Abdullaay Haaruuna Sih (Koolaaɗo Kuuɓal Fedde ndee), Bookara Aamadu Bah (Kalfinaaɗo kumpital fedde ndee), Jibi Umar Mbooc, Maalik Aamadu Saar (Kalfinaaɗo eɓɓaaɗe Fedde ndee) e Muusaa Aamadu Jallo. Ɓee fof ko janngingol (so wonaa Maalik Saar) woni fannu mum en, tee ko jannginooɓe Pulaar gila 1976 (ko famɗi fof), haa jooni.
To bannge heblo too, ñalnde altine 21 abriil ndee, ko kollitgol tuugnorgal jaŋde ngal to bannge « taro », « binndol »e « hiisa ». Ñalnde altine 22 ndee, ko kollitgol faandaare ñalɗi ɗii e tuugnorɗe jaŋde ɗee, kam e njuɓɓudi golle… Ñalnde talaata 23 marse ko kollitgol kuutorɗe janngirdu, kam e rewindo e horo… Ñalnde 23 ko kollitgol no binndanɗe Taro ɗowretee, kam e jogagol kuutorɗe rewindo. Ñalnde aset 25 marse 2014, ko kollitgol ɗowgu winndannde Binndol e Hiisa. Ñalnde 26 marse ko kollitgol no winndannde ñalawma heblirtee e no hollitirtee, e refto, e uddugol ñalɗi ɗii.
Bookara Aamadu Bah
