Ñalɗi 13, 14, 15 e 16 bowte 2022, heblo yowitiingo e jojjande aadee, e keɓgol kaayitaaji jeyi-leydi waɗii to Kayhayɗi to ñiiɓirde FONADH tawi ko e ballondiral fedde GIZ. Tawtoraa heblo ngoo ko terɗe jiilirɗe FONADH ummiiɓe Baabaaɓe, Ɓoggee e Kayhayɗi. Yuɓɓini heblo ngoo ko karallo to bannge sariya biyeteeɗo Joop Umaar. Ko adii ɗuum, ñalnde 30 jolal, eɓɓoore udditaama to Kayhayɗi e tawtoreede dendaangal ƴeewirɗe FONADH.
Eɗen ciftina Fedde FONADH, e gardagol Mammadu Moktaar Saar, maa won jooni hitaande ina gollondira e Fedde GIZ nde leydi Almaañ, ngam ɓeydude njuɓɓudi e mbaawka fedde FONADH. Hitaande 2021, joɗnde waɗanooma to Kayhayɗi ngam hoolkisaade caɗeele jogaaɗe won he ƴeeworɗe FONADH gonɗe e ɗeeɗo gure : Nuwaadibu, Kiifa, Rooso, Selibaabi, Ɓoggee, Baabaaɓe e Kayhayɗi. Ko ɗum waɗi, gollondiral Fedde FONADH e fedde GIZ jibinii eɓɓoore ƴeewndorde (projet pilote e ɗemngal Farayse) nde dumunna mum woni lebbi nayi tawi faandaare ndee ko tiiɗtingol kattanɗe ƴeewirɗe FONADH gonɗe he diiwanuuji ɗii. Eɓɓoore ndee toɗɗii ko ƴeewirɗe 3 : Ƴeewirde Kayhayɗi, Ƴeewirde Baabaaɓe e Ƴeewirde Ɓoggee.
Ko adii ɗuum fedde GIZ wallitii lappol pelle pinal tati (Fedde Ɓamtaare Pulaar he Muritani, Fedde Ɓamtaare ɗemngal e pinal Sooninke, e Fedde Ɓamtaare ɗemngal Wolof Wolof) ngam waɗde hirjinooji e nder diiwanuuji Brakna, Gorgol, Selibaabi e Kiifa : Lappol ngol waɗii ngartam no feewi.
E mbaadi ngoɗndi heblo, tawtoraaɓe ɓee mbaawii tiiɗtineede tigi rigi he fannuuji limtaaɗi ɗii, ɓe mbaawii kadi hokkeede kaɓirɗe ngam waawde waɗde hirjinooji 18 (nokku fof hirjinooji 6) ngam ɓeydaade faamaamuya ko feewti e ɗeeɗo toɓɓe. Eɓe poti hokkeede gooto fof deftere ɗowirde ngam waawde newnande ɗum golle hirjino.
Kalfinanooɗo heblo ngoo ina foti muulde deftere ɗowirde (guide) wonande heblaaɓe ɓee.
Ndeeɗo eɓɓoore ƴeewndorde, so waɗii ngartam, ina hasii fedde GIZ ina yiɗi wallitde eɓɓoore mawnde ngam wallitde denndaangal jiilirɗe FONADH e diiwanuuji ɗii fof. Maa keƴ heen Nuwaadibu, Kiifa, Rooso, Sehilbaabi, Ɓoggee, Baabaaɓe e Kayhayɗi.
Fedde Ɓamtaare Pulaar e Muritani jeyaa ko e FONADH, Mooɓondiral FONADH fuɗɗiima dañde hoolaare e jom kaalisaaji, walla mbiyen pelle mawɗe joom ngaluuji en ko wayi no : OXFAM, GIZ, CONCORDIS. Ɗeeɗoo pelle ngollondirii e FONADH. Fedde FONADH golliima, waɗii taaɓanɗe mawɗe ko feewti e kormagol jojjande aadee he nder leydi Muritani. Ɓe njokkindirii e dental leyɗeele Orop ngam rewindaade wooteeji leydi Muritani.
Ndeeɗoo eɓɓoore nde lebbi nay waɗaa ooɗoo sahaa ngam ƴeewndo e nokkuuji tati keeriiɗi, ɗum woni Ɓoggee, Baabaaɓe e Kayhayɗi.
Usmaan Ñaan, hooreejo FƁPM to Kayhayɗi
