… yoga e ɗee defte ngontiino heɗɗaawo hakkunde juulɓe e Ɓuraana «
Ko hono ɗuum kadi, ganndo goɗɗo muritaninaajo biyeteeɗo Seek Ahmed El Haadi, haali. E wiyde makko, defte ɗe Biraam duppi ɗee ko defte baɗananooɗe yontaaji ɓooyɗi, tee hay yimɓe ɓe ɗe mbinndananoo ɓee ngoppii ɗe ko ɓooyi, nattii huutoraade ɗe.
Yanti heen, annduɓe heewɓe ina njedditii ɗe, ina e ɓeen Seek Siidi el Muttaar El Kunti e Almaami Buddaa el Buseyri. Buddaa ina heewnoo wiyde “ kala jondiniiɗo e geɗe nanondiraaɗe, yaawataa woorde laawol Maalik ” ngam yiɗde wiyde tan, soklaani ko yimɓe ina tuugnoo e geɗe keewɗe gonɗe e defte Kaliil (fatwaaji) ɗi yimɓe kawraani e mum en. O wiyi wonde defte duppaade ɗee, ngonaa Ɓuraana, ngonaa Sunna. Ina anndaa, e wiyde makko, wonde ubbugol walla duppugol defte meeɗaa jaggireede no tooñannge nii, sibu hay nulaaɗo Alla, hono Muhammed (YAWM) wiyiino “ kala binnduɗo e am ko alaa e Ɓuraana, yo muumtu. Hoto mbinndee e am so wonaa Ɓuraana ”.
O wiyi wonde wonaa jooni duppugol defte fuɗɗii. Defte ganndo biyeteeɗo Ebi Muhammed Ibn Hazm el Anndalusi (duuɓi 456 ko adii Hijiriyya) fof nduppanooma caggal nde luurdi e annduɓe laawol Maalik woɗɓe. Kono alaa ko o jaaborii so wonaa wiyde :”Yo ɓe nduppu kaayitaaji ɗii, kono ko winndanoo e majji koo yo heddo e ɓernde am ”. Ko ɗum heɓtinoo kadi defte annduɓe woɗɓe… Won heen nii ko kam en mbaggintunoo yo defte mum en nduppe so maayii, ina heen noon ko defte keewɗe faayiida sanne. Kono joom mum en kulatnoo heen ko hoto almudɓe mum en njaggirde ɗeen defte no Ɓuraana nii. Ina limtee e ɓeen Subetta Ibn El Hajaaj, gooto е ɓurɓe humpitaade konngol nulaaɗo. E miijo Seek el Mehdi, ina waawi nii tawa ko Biraam duppi ɗee ɗoo defte koo “ko huunde moƴƴere, sibu yoga e ɗee defte ngontiino heɗɗaawo hakkunde juulɓe e Ɓuraana”.
