Jaaynde Lemag habrii ñalnde 14 settaambar 2013 wonde « laatiima tigi, ɗemngal Tamasig (ɗemngal berbeer en) waɗtaama e ɗemɗe kuutorteeɗe e lowre renndiire Facebook ». Ngaal ɗemngal noon huutortoo ko alkule biyeteeɗe Tifinag.
Facebook wiyi waɗiri ɗuum ko ngam huuɓnude ɗaɓɓaande haalooɓe berbeer e nder winndere ndee. Konngol Facebook ngol ko nii lelorii « On njaaraama e ko ɗaɓɓu-ɗon nde ɗemngal mon ɓeydetee e ɗemɗe Facebook. Tamasig e Breton e ɗemɗe keewɗe goɗɗe ɓeydaama e doggol amen ko ina wona sahaa jooni. Min ɓetii ɗe, daawal kala min ɓeyda heen ɗemngal fawaade e dalillaaji keewɗi (ɗemɗe ina keewi e winndere ndee, amin katojini e sahaa seeɗa ngam ɓeydude ɗe). On njaaraama nde paamanɗon min, on njaaraama e kuutoragol mon Facebook ». En njiyii, ko Berbeer en ɗaɓɓi, keɓi ɗuum. Ko ɗum addani en naamnaade hol ko haɗi Fulɓe ne ɗaɓɓude ɗuum ? Haa arti noon Fulɓe ina mbiya ina njogii pelle hakkunde leyɗe « daraniiɗe ɓamtude e tabitinde pulaagu » ? Haa arti noon, hay Dental Afrik ina sosi njuɓɓudi ndi alaa ko toppitii so wonaa ɓamtude Pulaar/Fulfulde, mbiyeteendi FULCOM.
Ciftinen tan, lebbi seeɗa hade ɗuum, Microsoft naatniino Tamasig e topirɗe mum, yeru e Windows 8. Ko wonaa ɗuum, eɗen nganndi Wolof waɗtii huutoreede ko ɓooyi e nder Google, gila 2010, rewrude e « Google Senegal » walla mbiyen « Sayto ci Google » ; ndeen yiylorde wiyetee ko “Gëstu ko ci Google”.
Eɗen nganndi kadi Windows 8 e Microsoft Office fof ina ngoodi e Wolof gila e lewru suwee 2013. Yoga e ɗeen topirɗe ina ngawtoo e ndeeɗoo jokkorde : http://www.microsoft.com/wosn/download/default.aspx Ko wonaa ɗuum kadi, resorde Google wiyeteende « Google Drive » ina woodi e ɗemɗe Afrik, hono Afrikaan, e Swaahili e Sulu e Amharik (ɓurngal heewde haaleede to Ecopi) ko ina wona lebbi jooni. E ñalngu hannde nguu, to bannge naatgol e karalleeje kese, Pulaar ina woɗɗi, woni ko caggal, caggal Wolof. Ko ɗum addani jaaynde wiyeteende peeral.com winndude : «Neɓaali Google hollii eɓɓo mum fii ɓeydugol e doggol ɗemɗe Google Translate ɗemɗe jowi Afrikiyankooje: Igbo, Hausa, Zulu, Somali, Yoruba.
Lamndal ngal Pullo fow yiɗi anndude : ko Goomu Fulfulde jeyaangu e Dental Afrik (UA) woni gollande Fulfulde ? Ko waɗi gila ngu ari ɗon Fulɓe yi’aali Fulfulde no ɓamtoo yahra yeeso ? Fulɓe haanaa jooɗaade tawa lamndaaki hono ɗee lamnde (ƴami). Yo kala yiɗɗo Fulfulde neldu lamnde mum faade e Goomu Fulfulde (Fulfulde Commission) lamndoo ko ɓe jokki toon e innde Fulɓe. Ndaa les ɗoo email-ji maɓɓe : http://www.acalan.org/eng/vcblc/ cltv_fulfulde.php »
Bookara Aamadu Bah
