Nokkuuji kisal e ndeenka leydi ndii ɓeydanaama kaalis : konu nguu ɓeydanaama fotde miliyaar, reenooɓe tufnde geec ɓeydanaama kam enne miliyaar ugiyya, sanndarmori hedde 600 miliyoŋ, polis 400 miliyoŋ, reenooɓe kisal laabi (« yimɓe Miskaaru ») fotde 73 miliyoŋ. Ɓuri famɗude ko ɓeydanaa ko gardeeɓe, sibu ko 12 miliyoŋ fat. Ko noon kadi wonande jaaynirɗe dowla ɗee, hono tele e rajo Muritani.
Bidsee tele gonnooɗo 230 miliyoŋ rawane, hikka ko 460 miliyoŋ. Mo rajo Muritani gonnooɗo 90 miliyoŋ wontii 360 miliyoŋ, mo AMI (Agence Mauritanienne ɗInformation), gonnooɗo 90 miliyoŋ wontii 180 miliyoŋ, mo Muulirde ngenndi gonnooɗo 35 miliyoŋ wontii 170 miliyoŋ. Ɗoo e hitaande ƴeewtoo-ɗen ko gollaa…
Mbelnaari Njuɓɓudi luulndo (Institution ɗe l’opposition), mo bidsee mum ustanoo no feewi, ina eɓɓanaa hikka 105 miliyoŋ. Nii woni hay so o yettaaki ɗo o wonnoo e hitaande 2009, hono 151 miliyoŋ (maayirɗe 2008 – 2009, Ahmed ina ɓallinoo Asiis), o ɓeydiima no feewi, sibu, e 2012 o tolninoo ko e 73 miliyoŋ. E 2007, ko 53 miliyoŋ wonnoo, 81 miliyoŋ e 2008.
Heddii ko haala woote ngam kesɗitingol depiteeji e senaateeruuji e meeriiji potnooɗe waɗde gila rawane ndeya, ina haalee, kono alaa ko ebbanaa. Ma a taw ɗe njogoraani yuggineede e hitaande 2013 ndee.
