Gootal e terɗe guurnooɗe FBPM hono Abuu Saydu Ac lollirɗo Abuuyel mo Likseyba Gorgol, hootii e joom mum ñalnde alarba 3/10/12 to Nuwaasd Nuwaaoot : O wirnaa ko Liseyba. O woniino hooreejo Catal FBPM to Liseyba tuggi nde catal ngal sosaa e 1980 haa 1994. Abuu Ac ko gorko guurɗo guurnunooɗo catal Likseyba e dumunna mo o ardii ngal, e daawal duuɓi sappo e nay. O waɗii heen doole makko e jawdi makko kanko e sukaaɓe takkiiɓe mo haa ngoni sabaabu wuurde catal ngal, haa ngal anndaa, ngal heɓtinaa e cate FBPM guurɗe. Tuggi 1994 fayde subaka mo о yalti aduna oo, ko o hooreejo teddungal catal ngal. O wuuriino, o wuurani leñol ngol, o waɗani ɗum ko tiiɗi.
Teskaama kaaraysiraagal makko, newaare makko, gila ko o suka ɗo o nehii e juuɗe gorgol makko Aysata Abdul e nder galle joom wuro Likseyba, galle Yero Baaba. Omo anndiranoo kadi wonde newaniiɗo e kaaldiiɗo kala neɗɗo. Kono omo ɗacci konngol : “ huunde feewataa alaa mantaaɗo, huunde kadi bonataa alaa ñinaaɗo ”. Nde maayde ndee yani, catal Likseyba waɗii toon sete jettinoowo duwaawu e innde Fedde Ɓamtaare Pulaar e Muritani. Ardinoo sete oo ko hooreejo catal ngal hono Abuu Dem, yanti e Abuu Aamadu Joop, koolaaɗo kuuɓal catal ngal e Abuu Bookara, cukko hooreejo e Umar Abuu Bah, tergal goomu jangde. Ɓe njettinii duwaawu e innde Yiilirde Ngenndi FBPM e innde Catal Likseyba faade e ɓesngu makko, kanko Abuu Ac e galle Baaba Nuuku. Yo Alla yurmo mo yaafoo mo, yurmoo yaafoo denndaangal maayɓe juulɓe. Yo Alla lomtinan ɓesngu nguu ngal ɗoo baasal. Aamiin.
