Fedde nde wonaa fedde laamu, wiyeteende « La lumière de l’Espoir », ko pirdaten « Annoore Ɗamaawu », yuɓɓinii yeewtere faatunde e Gondigal belngal hakkunde resondirɓe, ñalnde aset 17 suwee e alet 18 suwee 2023 to Batirdu Galle ngenndiijo Ganniije, tuggi waktu 9 subaka haa waktu 14 kikiiɗe. Yimɓe heewɓe arduɓe e wondiiɓe mum en tawtoraama jeewte ɗee.
Jirwini jeewte ɗee ko misranaajo gooto ine wiyee Ramses e jom suudu mum Venise (Weniis) wondude e ballal haralleeɓe muritaninaaɓe.
Yeewtooɓe ɓee kollii laabi ɗi wondiiɓe poti rewde mbele dewgal mum ine wona dewgal belngal. Ɓe pacciri kadi geɗe keewɗe tammbiiɗe fooye. Ine heen :
- Faamde ko woni fooyre ; Ngooroondi fooyre ; Ngootaagu fooyre ; baɗte njogoram nder fooyre ; kaaldigal nder fooyre ; kaɗooje kaaldigal ; nuunɗal nder kaaldigal ; kumpital nder galle ; jaafondiral nder galle ; kaɗooje yaafuya ; yaafuya mo nuunɗaani ; beldital ekn.
Jeewte ɗee njahrii no haanirta nii, tee haala keewka nafoore haalaama heen. Pooye keewɗe e pelle ɗe ngonaa pelle laamu, nootiima he kewu nguu no moƴƴi.
Eɗen mbaawi wiyde tan Annoore Ɗamaawu waɗii ko meeɗaa waɗeede, waɗii ko heewi nafoore, so jokkude enɗam nder galleeji, jokkude enɗam hakkunde resondirɓe, gollaade ko ine tiiɗtina enɗam, ɗum noon tiiɗtina renndo. Ɓe njaaraama.
Aysata Aamadu Bah
