Ñande dewo hoyre biir, ina hawri e 24 lewru settaambar (siilto) 2014, fedde leñol dental goonga catal baabaabe yuɓɓinii jamma paayodinɗo tawi ko ko fayti e ɓamtaare fulɓe, gila e jaŋde ɗemngal pulaar, haa e mogooji , wonndude e jime kam e naale juɓɓuɗe.
Oo jamma laatiima dillere mawnde kam e belaa wonande ɓiɓɓe fulɓe e jibinannde Baabaaɓe Looti beelal jeeri gural ceerno Njaay Bah, wuro wela ndiyam moƴƴa ŋari heewa ƴoogooɓe, gural yaaja mbeddaaji, yooɗa daagotooɓe.
Caggal nde sukaaɓe ngenndiyaŋkooɓe ɓee ,sukaaɓe fedde leñol dental goonga catal baabaaɓe 2014, yuɓɓini yimre mum adanere, tawi ko winndannde ƴoogaande e nder nguurndam renndooji men, tawi ittaa ko e nder deftere nde Abda Caam gorko mo baabaaɓe wallifiyi, ko heewi faamaa-ma kadi teskaa-ma. Dum hollitii tigirigi wonnde so tawii sukaaɓe e mawɓe kala pamminaa-ma wonnde tiiɗnata leñol ,semmbina ɗum tan ko ummanaade, e daranaade ɗum hono no leƴƴi aduna ɗii fof ndaranirii leƴƴi mum en nih.
