Dental pelle ngenndiije jojjanɗe aadee (FONADH) yuɓɓinii ñalnde aset 31 mee yeewtere tawi ko tiitoonde wootere wonnoo e ginol golle mum. Sibu e miijo maɓɓe ndeeɗoo haala ndeeɗoo toɓɓere nattii haaleede no toɓɓe keddiiɗe ɗee nii, ellee nattii jeyeede e ngoƴaaji dowrowi laamu ngu. E nder ɗuum Fonadh ina ɗaɓɓi ñawndugol ndeeɗoo toɓɓere nde waawaa seerndeede e ngootaagu e belditagol ngenndi. Ɓe ciftini ɗamaawu keɓanooɗo e « ñalɗi diisnondiral e kirjingol (JNC) e lewru noowammbar 2007, jowitinooɗi e gartugol mooliiɓe e ñawndugol bonanndeeji jotondirɗi e warhooreeji… E wiyde ndeeɗoo fedde, ñalɗi juɓɓinanooɗi ɗi ina potnoo yuumtude e ñawndugol ngolɗoo jaɓɓugol ɓurtungol jojjanɗe aadee tawa ko rewrude e kaaldigal e nanondiral. Fonadh noon ina jokki waɗtude hakkille e ɗee geɗe teeŋtuɗe e rewindaade gartugol mooliiɓe. E wiyde maɓɓe haa e oo sahaa alaa ko fuɗɗaa e ñawndugol bonanndeeji jotondirɗi e warhooreeji ɗi ; ɗum ɗoon noon ina faayni denndaangal muuyaaɓe jam e wellitaare. Ko ɗum addani Fonadh mo nganndu-ɗaa ɓooyii e ndee hare «salaare yejjitde» ɗaɓɓude e laamu ngu :
- Tabitingol jaawngol yiɗde hooreejo leydi o holliti e diskuur waɗnoo e maayirɗe suwee 2007 kam e nanondiral jaajngal ñalɗi diisnondiral jooɗinooɗi e lewru noowammbar 2007.
- Cosgol Goomu Ngenndi Njaambureewu toppitiingu ñawndugol caɗeele warhooreeji e tuugaade e humpitooji winndere nde to ɗoon bannge ;
- Juɓɓingol jeewte jaajɗe, demokaraatiyankooje tuugiiɗe e piɓle jojjanɗe aadee.
