Konu Israayiilina ɓeydoo ñalnde kala heblanaade yande e mahaaɗe nikleyeer to leydi Iraan. Tee, ɗoo e jonte ɗiɗi Israayiil e Amerik maa mbaɗdu ekko palagol misilaaji Iraan ngo hono mum meeɗaa waɗde. Ko famɗi fof ma ɓe njarribo peeje nay paddorɗe, nder weeyo, misilaaji ɗi Iraan waawi weddaade so tawii abiyonaaji Israayiil njanii e mum. To bannge dipolomaasi kadi konnguɗi kulɓiniiɗi mbaɗtii naneede. Yeru, Ehud Barak, jaagorɗo Ndeenka leydi Israayiil wiyi “ feere konuyankoore ina jeyaa e peeje baawɗe huutoreede ”.Tee o yiyndirii e Robeer Geyte (Robert Gates), Kuuɓal Ndeenka leydi Amerik. Ko adii ɗuum Beniyamin Natañahuu waɗii njillu Cuuɗiingu to Mosku ngam yiyndirde e Dimitri Medvedev. Ina wiyee nawnoo mo toon ko mbele Riis en ina mbaasa yeeyde Iraan kaɓirɗe ganndiraaɗe S-300 ɗe nganndu-ɗaa, so tawii compaama saraaji mahaaɗe nikleyeer Iraan, ina mbaawi boomde no feewi abiyonaaji bommbooji (eɗi piɗa fotde 80%).
Hooreejo leydi Riisi wiyi wonde leydi mum ina jogii hakke yeeyde “ kaɓirɗe paddorɗe” ɓe welaa, o reentini Israayiil wiyde ina yana e Iraan, hay so tawii o seedtiima wonde Shimon Peres, hooreejo leydi Israayiil, wiyii mo wonde leydi mum anniyaaki yande e Iraan. E nder ɗii ɗoo haalaluuji fof noon, anndude heen ko woni goonga e ko woni taawilaaji, ina metti. Ko geɗel gootel njenana-ɗen : huunde nde ñoosiima no feewi, sibu won kaayitaaji sirriyankooji kolliti wonde Iraan ina hattani feewnande hoore mum, e oo ɗoo sahaa, bommbo mum atomik, tee woni ko e feewnude misilaaji baawɗi ɗum roondaade.
Вookara Aamadu Bah
