Ñalnde alet 10 mee 2015, sukaaɓe Maafoondu Lelnde Bani kawii Kummbu e fijannde fuku koyɗe wattannde to Dingiral Nettek e nder Nuwaasot. Ɓe kawri ɓe ko ngaari 3 e ngaarol gootol (3-1).
Fijannde ndee dogii haa gasi, waɗaani pergitte to bannge ñaawooje, waɗaani kadi duko walla luural hakkunde fettooɓe alaa ko haali hare. Ñaawooɓe nayo fattamlamɓe ɓee, ngummorii ko to Federasiyoŋ Muritani Fuku Koyɗe (FMFK). Kamɓe ngoni Asan Gey, ñaawoowo hakkunde, Huley Diba (oo ko debbo), ballo gadano, Moktaar Keneme, ballo ɗimmo e Janngoo Koytaa, ñaawoowo gonɗo e resorde (réserve). Huufi fijannde wattannde ndee ko fedde toppitiinde geɗe fuku koyɗe e nder diiwaan Gorgol.
E siftinde wonde tuggude e wuro Kummbu ngoo haa e gure saraaji mum, ko wayi no Saŋe Loobaali, Wompu, Haatabere, Yeerma, Goojoowel, Ar, Luggere-Pooli-boɗeeji haa e Ñaaruwal, gonɗe ɗoo e Nuwaasot, alaa heen ngo araani wallude ɓe e keewal. Hanki nde bawɗi ngoodi, Maafoondu heɓtiino raayuuji keewɗi e mbiruuji gila e nder dingire lammbaaji Fuuta hade mum wonde baaraan hakkunde Muritani e Senegaal e Kodduwaar. Tuggude e yonta Muusaa Mbaroodi Bah en, Abdullaay Demmba Daado Jallo, Abda Sammba Maymuuna Jallo, Jibi Soh, Lew Jallo, Ibraa Boolo Kontee, Saydu Aamadu Soh, daɓɓel joom moolo haa yettii Huudu Sih en, teddungal e wune coftal ɓalli meeɗaani woorde Maafoondu Lelnde Bani.
Njaay Saydu Aamadu
