Hannde o, ina hawraa, etee Fedde Ngenndiiji Dentuɗi ina semmbini ɗum, wonde waawi nawrude yiɗde ƴellitaare rewɓe nde yeeso tan ko farlinde e kala nokkuuji yo rewɓe toɗɗe e gardorɗe, ɗo laabi peretee, ɗo kuule ƴettetee, e ɗo sariyaaji taƴetee, tawa eɓe ndottanee limoore nde ɓe poti heɓde. Ko ɗuum tan sikkaa yettinta fayndaare nde. Ko ɗum waɗi e nder leydi men Muritani, caggal mbayliigu laamu mbaɗngu ñalnde 3 ut 2005, e nder ñalɗi diisnondiral ngenndiwal baɗanooɗi e lewru oktoobar 2005, rewɓe tawtoranooɓe ɓe ndaraniima yo ndottane hakke mo poti dañde e nder juɓɓule potɗe wotaneede ɗe.
Nii woni hawraa yo rewɓe ndokke geɗal tolningal, ko famɗi fof, e noogaas e nder teemedere kala (20%). Hannde o noon heddii ko ƴeewde hol ɗum laatortoo, sabu wiyde yo rewɓe mbaɗe e doggi kanndidaaji tañonaani, sabu so ɓe mbaɗaama e laaci doggi he ɓbe ngonaa ɓennooɓe. Ɗum noon naamndii ko yo peeje cakke tawa e kala njuɓɓudi toɗɗaandi ngaal geɗal 20% ina feña. ɓon laabi keewɗi e yeruuji keewdi ngoodi e nder aduna he, ɗo ɗum tabitinaa ; heddii ko yahdinde ɗum e ngonka leydi men. Ɗum noon noddi ko darnde tiiɗnde, rewɓe ɓe kala kam e laamu ngu e partiiji politik e kala wallooɓe leydi ndi e compugol demokarasii goonga e goonga.
Kajjata Maalik Jallo
