Ñalnde 17 noowammbar 2023, Mister George Weah, gonnooɗo hooreejo leydi Liberiyaa gila 2017, dañnooɗo sahaa e fuku bal, heɓtinii poolgu mo fooɗondirtunoo gardagol leydi ndii, hono Joseph Boakai. Ndeke wonaa kuudetaaji tan, e jeddondire poolgu tan ngoodi he nder Afrik. Eɗen coklunoo ko ɓuuɓni ɓerɗe men, enen Afrikeeɓe, caggal deggondiral follooji laamu keewɗi (Gine, Mali, Burkinaa, Niiseer…). George Weah jaaraama, sibu hay so hawaama, ko Liberiyaa gañii. Neɗɗo ine hawee, heddoroo ndimaagu e wonde jontaaɗo ! Mister Georges ko jontaaɗo!
Njeñtudi woote ɗee yalti ko ñalnde aljumaa 17/11/23, caggal nde woote ɗee njoofi e nder ko ine tolnoo e 99% birooji woote ɗii, tawaa Joseph Boakai, jahroowo e duuɓi 78 heɓii heen 50,89%, e Georges Weah 49,11%. Ɗum noon woni hakkunde maɓɓe ko hedde 28 000 daande, caggal nde fotde 1,6 miliyoŋ gootirgol limaa. Fotde 65% yimɓe ɓee fotnooɓe wootde ɓee, ngootii.
Toɗɗegol Geoges Weah ñalnde 26 bowte 2017, yo ardo Liberiya, addaniino ngel cukalel mawnungel e leeɗe baasɗe Monrowiya wuurde laatagol koyɗol mum ɓurngol welde, caggal nde heɓi tolno toowɗo e nder fuku bal (Afriknaajo gidiiɗo wonde Bal kaŋŋe e hitaande 1995). Ɗum jibiniino kadi ɗamaawu mawɗo caggal wolde ɓesngu (250 000 maayɗo hakkunde 1989 e 2003), caggal kadi ñawu Ebola (ko ina ɓura 4 800 maayɗo hakkunde 2014 e 2016). Kono tan ɗamaawu e koyɗi belɗi nguusii dow nguuraandi. O sappaninooma haɓde e mbuuñaari e daranaade ɓamtaare, kono ɗum mettii siynude.
Nde o wonata kanndidaa e ndeeɗoo hitaande o huninooma, so o toɗɗitaama, joofnude tuugnorgal makko ngal joofaani. O huninooma kadi so o toɗɗitaama, waasde birgude mandaa tataɓo.
Bookara Aamadu Bah
