Ñalnde aljumaa 15 saawiyee 2010, Belees Kompaawore e Seneraal Seekubaa Konaate e Muusaa Dadis Kamara, ciifii nanondiral wonande ngonka politik to Gine, ngam yaltinde ɗum e iiñcuru wonnoo е mum ndu. Geɗe ɗiɗi ina maantini e ngaal nanondiral : Dadis heddotoo ko Burkinaa, ina jokka safraade, Seekubaa Konaate ardotoo yolnde hakkunde nde, woni lebbi jeegom payɗi, hade woote gardagol leydi ndi yuɓɓineede.
Ko teskini heen, ko addani en wiyde “ Dadis wonaa Asiis ”, e ɗeen ɗoon woote, hay tergal CNDD (Goomu koninkooɓe Gine) gootal waawaa wonde heen kanndidaa, hay tergal gootal Guwanama e mudda potɗo toɗɗeede o, wonataa heen kanndidaa. Diiso sabborgo (yolnde hakkunde ndee) ngo 101 tergal ina foti kadi toɗɗeede. Ko ɗee ɗoo ngoni toɓɓe nanondiral ngal :
- ɗooftagol wellitaare renndo haa arti noon e wellitaare jaaynde e miijo ;
- gaddagol kisal yimɓe ejawɗeele : -Juɓɓitingol e mahtagol Doole konu e kisal ;
- cosgol Diiso ngenndiiwo e mudda (CNT : Conseil National ɗee Transition). njuɓɓudi politik mbaɗndi 101 tergal tawi ardii ɗum ko neɗɗo diine, teskiingu denndaangal moɓe ɓesngu Gine ;
- toɗɗagol hooreejo jaagorɗe, gummiiɗo e Doole Guuree (Forces vives) ;
- compugol guwarnama ngootaagu Ngenndi ;
- ƴeewtagol doggi woote ;
- juɓɓingol woote gardagol leydi ɗoo e lebbi jeegom. Terɗe Diiso Ngenndi e Mudda kam e terɗe CNDD e Hooreejo jaagorɗe e terɗe Guwamama e mudda o, kam e terɗe konu e kisal gonɗe e golle, mbaawaa wonde kanndidaaji e ɗeen woote.
- ballitoragol reenooɓe (yeewoobe) siwil en e militeer en ɓee CEDEAO ;
- cosgol njuɓɓudi rewindo e ɓeto e dofto.
Siifɓe ngal ɗoo nanondiral ina daɓɓi e winndere nde wallitta to bannge politik e ngalu e karallaagal ngam tabitingol toɓɓe kaalaaɗe dow ɗee.
- Belees Kompaawore, hooreejo Burkinaa, kalfinaaɗo dogde e maslahaa hakkunde Ginenaaɓe, ma toɗɗo nulaaɗo keeriiɗo to Gine ngam wallondirde e laamu e mudda ngu.
- Ñalnde 21 saawiyee, Jean Marie Doré, gooto e hoohooɓe luulndo to Gine. toɗɗaama hooreejo jaagorɗe.
