Ñalnde 3 e 4 maaris 2014, huunde e hatanteeɓe gollotooɓe e ɓamtaare ɗemngal Pulaar (fotde yimɓe 10) kawritii ɗo Ndakaaru ɗoo, ngam tawtoreede gollordu Mozilla yowitiindu e naatnugol ɗemɗe men Pulaar e Wolof e nder topirɗe, haa teeŋti noon e feerorde Firefox. Mozilla halfini golle ɗee ko musiɗɗo men biyeteeɗo Ibraahiima Malal Saar, gonɗo hannde to leydi Farayse.
Ina tawtoraa udditgol gollordu nduu ñalnde altine 3 marse to AUF (Agence Universitaire de la Francophonie) Ndakaaru, gooto e sawndiiɓe kalifu kalfinaaɗo ko faati e karallaagal kesal e faggudu limngal (économie numérique) Senegaal e gardiiɗo Goomu FULCOM hono Fari Kah, e Ceerno Bah hooreejo fedde USE/PIP.
Caggal gostondiral konnguɗi, arɓe gollordu ɓee costi faade suudu masiŋaaji too. Nii woni golle puɗɗii : banngagol e lowre translatehouse.org (ɗo wiyetenoo translate.org.za) e kollitgol kuutorɗe firo, haa arti noon e biyeteengal Virtaal, baawngal aafeede e masiŋ kala, e gollireede tawa seŋaaki e internet ; ɗum ko hade yimɓe faade to sarworde firo seŋiinde wiyeteende Pootle, ɗo firooji ɗii mbaɗetee ɗoo, (pootle.locamotion.org) e mozilla.locamotion.org ɗo firo firefox waɗetee ɗoo. Tawtoraaɓe ɓee kollaa no mbinnditortoo (naatirta) e lowre hee, ɓe mbinnditii kamɓe kala. Nii woni janngo mum, ñalnde 4 marse 2014 ndee, ko lefu firooji « firefox 29 Aurora » e paamningol no ngo yahrata.
Tawtoraaɓe gollordu nduu ko ɓeeɗoo : Ibraahiima Malal Saar, Bookara Aamadu Bah, Malal Sammba Gise, Muusaa Abuu Ñaŋ, Caam Adama Alasan, Geɗaa Sillaa, Haaruuna Sih, Jibi Mammadu Gay, Fentee Buwaaroo, Hammadi Jah, Mammadu Buubu Ñaŋ e Raamattullaay Sih.
Jaltugol Firefox e Pulaar ko huunde teskinnde wonande ɗemngal men. Heddii ko jokkude golle e waɗde feere mbele pelle mawɗe karallaagal kesal ngal (Google, Microsoft, Apple ekn)ina njaɓa huutoraade Pulaar. To oon bannge, alaa e sago pelle e teelɗuɓe e laamuuji fof ndaranoo ɗuum.
