Ñalnde talaata 17 colte (feebariyee) 2026, Yiilirde ngenndiire Fedde Ɓamtaare Pulaar he Muritani e Goomu rewindo galle Pulaar, e Goomuuji ngenndi e huunde e adduɓe ballal mum en e mahngo galle pulaar e jaaynooɓe, kawritii to Galle Pulaar ngam yuurnitaade e jaɓde dokkitgol golle mahngo tata galle oo.
E nder heen, ɓe teskiima golle ɗee timmirii no lelniranoo e kalfingol golle ɗee. Ɓe mbeltiima kadi he majje. E nder ɗuum, hooreejo fedde ndee ɓamii toon konngol, kam e Yaayaa Aamadu Soh, hooreejo catal FƁPM e innde harelleeɓe mahndi ɓee, e Kajjata Maalik Jallo e innde adduɓe ballal mum en (ɓurɓe heewde ko mballiti), e Bonko Jallo gooto e adduɓe ballal mum en, e Faatimata Joop, tergal Yiilirde ngenndiire FƁPM.
Konngol hooreejo FƁPM
Ko adii fof miɗo salmina musiɗɓe rewɓe e worɓe, wallooɓe tedduɓe, ɓe nganndu-ɗaa ko horsinɓe pinal, ko horsinɓe ɗemɗe ngenndiije, ko horsinɓe pinal e ɗemngal pulaar.
– Hannde kadi ko weltaare mawnde huccitde e kaa tata Galle Pulaar ka koyɗatno-ɗen ko ɓooyi. Eɗen kiisii ndii ɗoo mahdi ko tiiɗndi, mballoori hisnude galle pulaar oo. Eɗen njetta heen denndaangal waɗnooɓe heen buuɗi mum en.
– Ngalɗoo gollal kadi tawtii golle keewɗe, duumiiɗe, dewondirɗe, memotooɗe, ɗe fedde ndee gollii he ɗii duuɓi 50 nguurndam mum, ngam ƴellitde e hisnude gootal e ɗemɗe men ngenndiije e pinal mum, hono pulaar.
Eɗen mbaawi limtude heen :
•Ɓoorgol 100 000 neɗɗo humambinnaagal
•Dallinannde laawɗingol e naatnugol ɗemɗe ngenndiije nder duɗe laamu e kitaale 1976, kam e ɗiiɗoo duuɓi, haa Duɗal ɗemɗe ngenndiije e IPELAN cosaa, ɗemɗe men mbaɗti jannginireede.
•Ine heen sosde e wuurnude jaaynde Fooyre Ɓamtaare, jaaynde Pulaar, wootere wajjere nder leydi ndii e diiwaan oo; sosaande e hitaande 1980 (duuɓi 46 hikka) jaaynde sarde pinal e ganndal, ƴellitnde ɗemngal.
•Ine heen lowre internet, hono pulaar.org sosaande e lewru sulyee 2007 (duuɓi 19 hikka), gila e puɗɗe internet haa hannde, lowre pulaar ɓurnde mawnude e wuurde he internet, sarnde pinal e ganndal, ƴellitnde ɗemngal.
Oo ɗoo galle pulaar diidaaɗo ɗoo kadi, maa wonoy kañum ne nokku jaŋde, nokku wiɗto e ganndal, nokku pinal, udditaniiɗo denndaangal ɗemɗe leydi ndii, haa teeŋti e sukaaɓe.
Eɗen njetta kaaɗdi njettoor denndaangal walluɓe en taccude ngal ɗoo daawal.
So Alla jaɓɓi, daawal paangal wonoyta ko darnude huɓeere mawnde ndee.
E nder ɗuum eɗen eeroo denndaangal muritaninaaɓe (nder leydi, caggal leydi, laamu, juɓɓule) nde gaddata heen ballal mum en : mbuuɗu famɗaani, miliyoŋ ɓurtaani ! Ɓe ngannda ɓe mbaɗi jawdi maɓɓe ko he pinal maɓɓe, ko e jaŋde, ko he janngo ɓesnguuji maɓɓe. On njaaraama
Hooreejo FƁPM (BAB)
