Muritani siifondirii e Goomu Orop (Commission Européenne en Mauritanie) nanondiral ngam heɓde kaalis ko mahiri gudoroŋhakkunde Kayhayɗi, Mbuut, Sehilbaabi e Guray.
Ngool laawol maa waɗ celol fayde Fum Geleyta. Njaru golle ɗe tolniima e capanɗe jeegom miliyoŋ e teemedde jeegom ujunere ooro (66 600 000 ooroo) walla mbiyen noogaas e tati miliyaar e capanɗe jeetati e jeenay miliyoŋ uguiyya. Njuuteendi oo gudoroŋo ko 159,5 kiloomeeteer.
Fotde poŋuuji 8 maa mahe ko adii ɗum hakkunde Sehilbaabi e Guray ngam taccude caaɗli. Njuuteendi celol paangol baaraas Fum Geleyta ngol ko 24 kiloomeeteer. Maa yimɓe satiiɓe laawol ngol pindine kadi ko fayti e caɗeele sato kam e ñawu Sidaa. Golle ɗe fof ina poti gasde e nder lewbi 52, walla mbiyen duuɓi nay e lebbi nay. Sikke alaa ɗee golle so njoofii maa ɗiiɗoo nokkuuji njokkondir hankadi e leydi ndi, sibu eɗen nganndi caɗeele ɗi ngondunoo : ummaade Nuwaasoot fayde Sehilbaabi ko caɗeele mawɗe. Ngartam mum kadi maa feeñoy to bannge faggudu.
Eɗen ciftina tan Goomu Orop ko kam ñamlunoo kadi leydi ndi kaalis ngam peewnugol laawol ummaade Magtalasaar faade Juk, laawol Ayyuun fayde Haasi kam e laawol hakkunde Ɓoggee e Rooso gonngol e maheede.Eɗen njaakorii tan maa golle ɗe peew, sibu hoto njejjiten, oo kaalis wonaa dokkal ko ñamaande teddunde nde denndaangal ɓiyɓe Muritani njoɓata.
Bookara Aamadu Bah
