1-Taaltaalɓe e barinaaɓe saarsaarɓe e kamaraaɓe, Mboocmboocɓe e sohsohɓe, ɓanwanɓe e Jahjahɓe, Jawjawɓe e lihlihɓe, Aan-aanɓe e ndonngooɓe.
2-Ɓee sappo e ɗiɗo njiɗi ñebbe, ɓe njiɗi ñebbe tan haa ɓurti, ko ɓe potndi ɗum woodaani, Ñebbe ɓurani ɓe hay afo galle!
3-Ñebbe kay so ɓe ceediima, ko ɓe njaggi fof ɓe ngoppii, A waawaa ɓe hanndaade, A waawaa ɓe hay heytaade.
4-Hay faataato ɓe ngoppaani, ɓe njiiri fof ko haa laaɓi, mo heen kala saawi nawti, fasni bannge ina muuɗa.
5-Ɓe nguufi kooɓe haa keewi, Ɓe njaajni goddi haa njaaji, ɓe ngutti deedi haa mawni, deedi petii,ƴuufi ene ŋuura.
6-kono noon fof ɓe njaggaani! ɓe keñii ndenti ngoomaani, ɓe mbaɗi batu ngu luuraani, ɓe njetti ñebbe ko leelaani.
7-Ɓe biyi: »taaree maa ñewñewol, ko aan wiyetee yuman ñebbe, ñire ene moƴƴi e ñiire, Tee cooke ene itta tooke »
8-Ɓe mbiyi cooke no mbay welde, ko ndiyam mum ɓuri safde, mo wooɓi heen kala jommba, ummoo, summba ene ammba.
9-Ɓe keɓɓitii kadi ɓe mbiyi: Ndiyam cooke, rufetaake, Rufetaake, ko njaram bewɓe, Kala dufɗo njaram bewɓe, ɗoon kay taƴii goddi jeyɓe!
10-Ɓe mbiyi ko kamɓe ngini bewɓe, sabu ko kamɓe ngoni jeyɓe! ko ñebbe ngoni nguura maɓɓe, ɓe mbaɗdi heen kdi taɓɓe, ɓe camma eɓe mucca jaɓɓe.
11-Ɓe mbiyi ko kamɓe fof ndenti, ko ɓe haɓɓere nde sappo e ɗiɗo, sappo e ɗiɗo haarɓe ñebbe, annduɓe siruuji ñebbe, kala ɓure mum heeroriiɓe.
12-Ɓe mbiyi kamɓe njeyi ñebbe, woni seede mum ko ɓe ronɓe, Alaa fof mo ɓe ndenndi, so wonaa tan mo ɓe nanndi, ɗuum yimɓe ɓee ina nganndi.
Abuu Aamadu Caam to Sebkha-NKTT
