Haayre weeyo ɓurnde mawnude tawaande e dow ɗaŋre men Ngaawe, wiyete ko Hoba, to Namibi, nde yiyta ko hitaande 1920.
Hoba ko haayre njamndi, maa nde wonoy 66 000 kg, nde nde yanata e dow ɗaŋre hee, kono hannde heddii e mayre ko 60 000 kg, ko heddii koo ñaamti, njuuteendi mayre ko 2,7 meeteer ; njaajeendi mayri ko 2,4 meeteer, tekkeendi mayre ko 0,9 meeteer.
Haayre ndee haaɗaani tan e ɓurde mawnude e kaaƴe weeyo tawaaɗe e dow leydi ɗee, kono ko nde haayre njamndi ɓurnde mawnude.
Iwdi haayre Hoba laaɓaani no feewi, kono ɓuri sikkeede nde iwi ko e lefol kaaƴe hakkunde ɗaŋe Mbaañ e Rojju. Duuɓi haayre ndee maa wonoy duuɓi miliyoŋaaji 190, ko njamndi ɓaleeri ɓuri doolnude e mayre, nikel e huunde e kobalt e fosfoor ina tawe heen, hono ndee haayre yiyaaka.
Haayre ndee fotata yande e leydi ko hedde duuɓi 80 000 caggal, nde nde yanata ndee yaama tawa yimɓe Homos Sapiens ina he nukkuure ɗo nde yani ɗoo, kono yimɓe hannde ɓee tabitaani eɓe tawanoo njomu haayre ndee, sabu batte maɓɓe laaɓtuɗe kaaɗi ko duuɓi 30 000 caggal.
Kono, ko neɗɗo feri fuɗnaange Afrik sarii e ko heddii e Afrik ko, haa to worgo, wonii duuɓi 60 haa 80 ujunere hannde.
Ina sikkaa haayre ndee deŋkorii ko seese e dow leydi, ɗuum waɗi keletine mayre heewaani, kadi ɗo nde yani ɗoo waɗaani ngaska mawka, kadi nde ñiɓi tan, nde fusaani.
Gila ndeen ko ɗoon tan nde ñiɓii, nde sostaani, nde tawnoo ende ñisi no feewi, kadi leydi muuliindi e mayre ndii hisnii nde e ñaamtagol. Ɗo nde yani ɗoo ko leydi potndi, to woɗɗi yimɓe, ko diwre sawaawu, ɗuum fof ina walli e hisnude nde.
Jooni kam ko nde reenaande, ko laamu Namibi reeni nde, hade nde bonneede, gila e helooɓe haa e heefooɓe, yimɓe heewɓe ina ngara yiyde nde, ina waɗani ɓe ngartam mawɗam.
Hammadi Jah
