Kaadii Riyad mo nganndu-ɗaa ko kam halfinaa ñaawde luural pooɗondiral oo ɗoo suka, yamirii yo «test ADN» (Ƴeewndo ADN) waɗe ngam anndude jinnaaɓe makko. Eɗen ciftina tan wonde ooɗoo suka ina sikkaa ko dahanoo – ɗo gila 1993 (en kaaliino ɗum e tonngoode 42), kono tan won debbo hardaane gooto wiyi wonde ɗum woodaani sibu ko kam jibini mo.
Ɗum noon wontii pooɗondiral hakkunde galleeji ɗiɗi. Lewbi joy jooni ko Aliyuun Soh (walla Muhammed wul Barahiim) woni e juuɗe ñaawoore, ina ronkaa yo gas. Jooni waɗi ngal ɗoo taaɓal. Fooɗondirooɓe ɓee fof njaɓii feere nde. Ina anndaa noon, dokke Alla, «Ƴeewndo ADN» heewaani fende. Yo a taw tan joomum ina jogii ko laaɓi. Ko woni e lahal kala noon, maa juuɗe njiytu! Ƴeewndo ADN heewi waɗeede ko ngam anndude jinnaaɓe neɗɗo, jibinɓe ɗum.
So neɗɗo ina ƴeewndoo ƴiiƴam mum, alaa e sago ƴiiƴam mum ƴettee. So artii e ƴeewndo ADN, woodat tan ko ƴeeftaa e nguru joomum, kam e sikkaaɓe ko jinnaaɓe mum ɓe. To leydi Farayse, waawi yamirde ngoo ɗoo ƴeewndo tan ko sariya (ñaawirɗe), tee maa baɗanteeɗo ɗum o (ɗooyene ko Aliu Soh) jaɓa. To Espaañ e Almaañ belaaɗo fof ina waawi waɗde ƴeewndo ADN ngam anndude jinnaaɗo mum gorko.
So neɗɗo ina hebloo ƴettude huunde e ɓanndu mum ngam ƴeewndo ADN, fotaani yarde walla ñaamde 30 hojom ko adii ɗuum. Ko ƴeewndetee ko, ƴettirtee ko leggel piilangel wiro e ceɓtam mum. Ko bannge pillaaɗo wiro o neɗɗo naatnata e nder hunuko mum, yiiga ɗum no moƴƴi e nder kooɓe mum fotde hojom. Caggal ɗum ngel waɗtee e mooftirgel maggel ngel neldee nokku ƴeewirɗo (laboratuwaar).
