Garɗo debbo nafaani, so arno gorko, limtee he lutti nafi banndum en. Hajjaa Kummba Ñas, ko debbo jibidinaaɗo he diine mum, mawninde he timmal mum, nafi wuurdiiɓe mum, ko yeewni ɗanniiɗo, woyi maayɗo koo.
Hajja Kummba Abdullaay Ñas jibinaa ko he hitaande 1932 to Gede Wilaas. Yumma makko wiyetenoo ko Raki Amnata, baaba makko ko ceerno Abdullaay Ñas, ganndaaɗo he seernaaɓe. Ndeke Hajja Kummba, so askitinaama he Podoor, noddiraama Kummba Podoor, ndaw fodde, haa o lolliliri noon, to Fulɓe e Salfalɓe e wammbarankooɓe Kiifa, yoga heen boom innirii mo ɓiɓɓe sabu korsa e yiɗde. Ko kanko jeewninoo galle jinnaaɗo Njaatige Daraamaani Hammaat Joob, to cuuɗi men Oolo-Oolooga. Oon taanoo Njaatige Daraamaani, ko garde wonnoo gila jamaanu koloñaal en, jontidaaɗo e Ngalanka, ndowlidi e pelɓondire e Wullum Seyki, alaa mo nanaani ɓeen yontaaɓe Fuuta. O adii gollaade ko to Tamsaket, o arti ɗo Baabaaɓe Looti ɗoo, o heɓoyi alteret makko to Kiifa. Taanoo Njaatige nootii tigi e innde mum, laatii njaatige fuutankooɓe heewɓe gollannooɓe he oon diiwaan. Ko toon noon innde Hajja Kummba Abdullaay dowli, darjiri Kummba Podoor. Ko adii ɗuum tawi o fuɗɗiima gollude he cafrirɗe haa toon to Kiifa, ko heerii, he fannu ŋarwingol. O fuɗɗii gollaade heen gila he hitaande 1966 haa he 1995, nde o heɓii alteret makko. O fannorii ɗeen golle, o heɓi heen humpito luggiɗngo, kadi Allah rokki mo heen wune, nde wonnoo ko o laaɓɗo reedu, ganndo diine, juulɗo keeleelo, baaroowo Allah, keewɗo njurum, mo ɗaanantaako ŋarwuɗo.
Ɓeen ŋarwuɓe tawii Hajjaa Kummba he cafrirɗe Kiifa, o tawoyii ɓe kayne he jeereende dow keeceeje gelooɗi e bamɗi, nder nguli e ɓuuɓol, nder naange, kineeli e ƴiiwoole. Neɗɗo ina moƴƴa, waawa ko gollata, Allah wirna wone mum. Kono Allah daɗndii heen Taanoo Hajjaa Kummba Abdullaay Ñas, Kummba Podoor Duwayra.
Alkamisaare 25 mbooy 2021, ɓesngu Kiifa fof renndii e Moritaninaaɓe fof he kuuɓal, ndokkii mo seedantaagal keɓtingol darnde makko nde alaa yeru. Taanoo Mburel, mbuuree ɓurnoo he kaŋŋe, min ñaagiima Allah nde juutnata balɗe maa, moƴƴina baɗtane. Taanoo Hajjaa Kummba yo a jogoro jam.
Boobo-Loonde.
