Ñalnde alkamiisa 24 suwee, Hapa saaktii njeñtudi wiɗto faatungo e jaayɗe leydi ndii wonande hitaande 2020 ndee. Losko ngoo waɗaa ko hakkunde oktoobar e desammbar 2020. Ine jeyanoo e paandaale losko ngoo, « sosde faawru keɓe limɗinaandu, timmundu jaayɗe laamu e jaayɗe keeriiɗe nder leydi ndii, gila e jaayɗe binndeteeɗe, internet, keɗeteeɗe e jeeɓeteeɗe » ; « yuɓɓinde e ƴellitde jaayɗe leydi ndii » ; « anndude ɗo yawnii he majje, kam e semmbe majje »; « tiiɗtinde hakke ɓiɓɓe leydi ndii to bannge jogaaɗe jaayɗe moƴƴe, keewɗe eddaaji ».
Wiɗto ngoo yettiima 237 jaayɗe e juɓɓule jaayɗe peccitoriiɗe hono nii : jaayɗe laamu tati (3) ; jaayɗe nanyiyngo keeriiɗe 8 ; jaayɗe keewmejaaje 51 (jogiiɗe ko famɗi fof lowre internet e jaaynde winndaande, tawi ine mbaawi jogaade rajo…) ; lowe internet 122 ; jaayɗe binndol 19 ; jaayɗe jeñtinooje loowdi nanyiyngo 8 ; tammborɗe elektoroniije 4 ; jooɗaniiɓe jaayɗe winndereeje 41 ; nulaaɓe juɓɓule 2.
Wonande jaayɗe binndaaɗe ɗee, ko nii deggondiral majje siforii, fuɗɗoraade ɓurɗe duumaade fayi les.
Jaayɗe 10 yontereeje
- 1. Le calame
- 2. Essada
- 3. El Maraabi
- 4. El Mouhakik
- 5. Sawt El Oumal
- 6. MauritaNoix
- 7. Fooyre Bamtare
- 8. L’Eveil Hebdo
- 9. Essada Echo
- 10. El Arab
Jaayɗe 10 ñalɗiije (ñalnde fof)
- 1. El Aghsa
- 2. Attawassoul
- 3. L’Authentique
- 4. Sadaa El Ahdath
- 5. El Emel El Jedid
- 6. Rénovateur
- 7. Quotidien NKTT
- 8. El Meyadine
- 9. Essevire
- 10. El Alam
Eɗen teskoo wonde Fooyre Ɓamtaare nawdaa ɗoo ko he jaayɗe jaltooje yontere kala, ko ɗuum nii addani nde yettaade 44 % ko nde fotnoo yaltude. So nde hiisanooma e jaayɗe lewru kala, wonande hitaande 2020, nde yettotono 100 % ko nde fotnoo yaltude, sibu nde sownaani hay laawol gootol e hitaande ndee.
Kono haa jooni tolno mayre ine heewi faayiida sibu, so en tuugiima e ko yaltinaa koo, so en kiisiima jaayɗe jaltooje he Farayse ɗee, ko jaaynde Le Calame tan ardii nde. Ɗumɗoon noon firti tan, ko kayre fof e famɗude jogogal, nde waawii diwde ko ɓuri darnde mayre. Yo Alla nawru ɗum yeeso.
Bookara Aamadu Bah
