Ñalnde alkamiisa 27 oktoobar, hare leydi waɗii to Fanay Jeeri (departemaa Podoor, Senegaal). Nde waɗii maayɓe ɗiɗo e gaañiiɓe heewɓe. Addi ɗum ko laamu Sengegaal ƴettude 20 000 hektaar, totti ɗum Italinaaɓe yo ndem heen pataas peewnirɗo isaas. Dokkal ngal yahdaani e kaaldigal e yimɓe nokku oo.
Ɓeen nii ko saliiɓe ɗuum, sibu e wiyde, nokku dokkaaɗo oo ko nokku durngo jawdi maɓɓe. So o tottaama italinaaɓe, alaa e sago gure keewɗe eggat, jawdi maɓɓe wontaa dañ ɗo duri, cehe e jamaaji e jumaaji keewɗi kelete…
Ko kewi Fanay koo ina foti addande laamu Muritani miijtaade ko wiyata ina waɗa diiwaan Ɓoggee ko, so wiyde ina ƴetta 50 000 hektaar ina rokka ɗum sosiyatee Sawuudnaajo, tawi diisnaaki joom en leydi ɓee. Ɓeen nii, fotde 60 wuro e deebaaye, mbiyi ko njaɓaani ɗuum.
Ñalnde 27 mee 2011 ɓe njooɗiima e batu ɗo Ɓoggee ɗoo ngam hollitde salaare maɓɓe ndee feere “ bonnde ”. Caggal ɗuum ɓe mbaɗii lappol ari ɗoo e Nuwaasoot jokkondiri e hoohooɓe heewɓe kam e laamu nguu e jooɗaniiɓe ɗoo leyɗe goɗɗe, ngam faamninde ɗum en hol ko addani ɓе salaade ndee feere : boomaare nokku to bannge faggudu (jawdi maɓɓe wontaa dañ ɗo duri, uddugol gure keewɗe…) e ko wonaa ɗuum tan.
Eɗen teeŋtina tan wonde saliiɓe ɗum ɓee ko denndaangal hoɗɓe e nokku hee, ina waɗi Haalpulaar en, ina waɗi Safalɓe woɗeeɓe e ɓaleeɓe kala.
Ma en ngartu heen e tonngoode men aroore.
