Ñalnde 25 mee 2012, Abdullaay Wad noddii jaayɗe to galle mum, ɗo Ndakaaru ɗoo, ngam hujjikinaade e riiwtude sikkeeji ɗi fawetee kam e yimɓe mum, ina mbiyee porlii jawdi ndenndaandi, haa arti noon e haala otooji 600 jaltinaadi persidaas, majji (ngujjaa) ndonkaa yiyteede ɗii.
O dallinii iwdi jawdi ndi ɓe mbiyetee aɓe njogii kanko e ɓesngu e makko ndii, o wiyi o hulaani cunnagol iwdi ndiin jawdi. Haaɓre kadi ina feeñi e haala makko nde o wiyata “ min nattii waawde muñde ko min mbiyaa min mbaawaa yaltude Senegaal. So alaa ko min mbaɗi, amin poti haalaneede, mbele amin mbellitoo yahde e artude ”. O wiyi kadi “ Makki, a reeniino ɗemngal maa, mbaɗtu-ɗaa hakkille e ko kaalataa e kampaañ hee, sibu ko a jiɗnooɗo heɓde laamu, ina moƴƴi e maa jokkirde noon. So woodi garɗo e maa ina haalan maa huunde faytunde e jom suudu am walla e yimɓe woɗɓe, aɗa foti, ko idii fof hoolkisaade, so wonaa ɗum, mbattintu-mi ko haalde ko nganndu-mi koo, ɗum ɗoon noon ina waawi muusɗe ”. Kaa haala kam ina laaɓti, ko yiɗde wiyde tan “ yo Makki suur hoore mum, so wonaa ɗum … ”. O wiyi kadi yo makki “ yo Makki jaggu ministeruuji mum ”.
E wiyde makko “ alaa fof ko min njaltini e galle laamu hee, so wonaa alluuje nate ɗiɗi ɗe luɓinoo-mi sokna Wad ”. Wonande otooji ɗii noon, o wiyi o ɗaccirii lomtiiɗo mo oo ko ɓuri 200 oto. “ Kono yimɓe makko naatnii mo juumre sibu mbiyii mo otooji ngujjaama ”. O ñiŋii no feewi ko ɓesngu makko takkaa koo, haa arti noon e ɓiyiiko Kariim, » sabu tan ko ɓiy hooreejo leydi « . O artii kadi e haala ANOCI (Nokku kalfinanooɗo yubɓinde Мoоɓondiral Lislaam, mo Kariimu ardinanoo), o wiyi wonde hay gooto haalataa heen haala Abdullaay Balde, ndaa ko oon yiilatnoo jawdi mooɓondiral ngal. Wonande 400 miliyaar ɗi ɓe mbiyaa, kanko e yimɓe makko, ɓe ndognii, ɓe mooftoyii Dubaï e nder Emiraaji goɗɗi ɗii noon, o wiyi “ O reentini laamu nguu, wonde so o welaama, kanko mo nganndu-ɗaa alaa ko majji e geɗe luulndo sibu makko ɓooynoode heen, omo waawi haɗde ɓe feewnitaade e laamu mаɓɓе. Кono haɗata mo waɗde ɗum tan, ko o kellifaaɗo, jiɗɗo demokaraasi, ɗooftiiɗo demokaraasi, kormiiɗo laamu.
Apr, hono parti Makki Sal oo, ɓuuɓtinaani, sibu waktuuji seeɗa caggal yeewtere Wad, jaabtii gila kelle ko law. Ko Seydu Gey ƴetti konngol wiyi “ ko idii fof miɗo sakkita miijooji ɗiɗi, jaabawol gootol e laɓɓitinaango wooto e wasiya gooto ”. Miijo adanngo ngoo ko “ Senegaal ñaawii hafeere Wad ”. Ɗiɗi, “yimɓe ɗamininoo e Wad ko fooftaade hankadi, kono wonaa wiyde ina jilɓina politik leydi ndii, sibu o dañii duubi (ko e lewru mee nduuɗoo o dañata 86 hitaande) ”. Miijo ɗiɗmo ngoo “ alaa fof ko waawi yerɓinde laamu nguu haa haaytina ɗum jokkude golle ummanii ɗee ”. Jaabawol ngol, ko wiyde Wad “ wonaa laamu mum hoolkistee, ko gõlle mum ”. O jokki “ ko Wad yahataa koo fof, ko gollata koo fof, dillinaani min, tee Apr ina heɓii e jaabaade ɗum laabi 10, walla 20 boom ”.
O joofiri wiyde “ diwaali e doƴƴaali alaa ko nafata. Kooliiɗo hoore mum fotaani hulde ”.
Bookara Aamadu Bah
