E ñalɗi heblo ɗi Hapa yuɓɓinnoo ñalnde 1haa 3 lewru suwee 2021, jaaynooɓe he ɗemɗe ngenndiije ɗee kebliino hujjaaji ɗi ɓe kolliti e joofnirde ñalɗi ɗii. Ko nii ɗi ciforii :
E nder ngardinndi Doosgal (Constitution) leydi ndii peeñngal ñande 20 suliyee 1991 biingal « ….ɗemɗe ngenndiije ko jeyi ngenndi denndaaɗo hakkunde Muritaninaaɓe kala, mo dowla foti daranaade, reena, ƴellita… ».
Kono teskaa jaayndeeji Muritani, wonii noon ɗi ndenndaandi ɗii walla jambureeji ɗii, njaadaani e ko joofaa e Doosgal leydi ndii. Ko ɗuum waɗi ɗemɗe ngenndiije e nder leydi ndii ko miskineeje e nder jaayndeeji ndenndaandi e jaambureeji. Sahaaji majji nde ɗi keeɗtetee newaaki kadi koko dooɓaa, liggotooɓe majji ndokkaaka kaɓirɗɗe, keblaaka ngam rokkude jaaynde nde mbeefeegu ngenndi.
Ngooɗoo heblo ngo HAPA heblani jaaynooɓe liggortooɓe ɗemɗe ngenndiije ko goo hannde, ko huunde fotnde manteede e semmbineede.
Ngam tabitinde jojjanɗe aadee e hakke humpiteede e nder Muritani e heɓde kabaruuji limtilimtinɗi, cariiɗi, keɓeteeɗi ngam rokkude golle jaayndeyaagal tuugingal e ɗemɗe ngenndiije, faayiida :
Minen tawtoraaɓe ngooɗoo heblo jaayndeyaagal he ɗemɗe ngenndiije, emin mbaggina :
– Juɓɓingol heblooji goɗɗi ɗoo e wuro Nuwaasoot haa e nder wilayaaji nder leydi ndii ;
– Ɓeydude sahaaji keɗagol jaayndeeji ɗemɗe ngenndiije e nder jaayɗe ndenndaandi e jaambureeji ;
– Jeytoragol jaaynooɓe ɗemɗe ngenndiije e kawgelaaji naatirde Duɗal Ngenndiwal keblowal yuɓɓinooɓe laamu, jaaynooɓe e ñaawooɓe (ENAJM) ;
– Gollinde jaaynooɓe ɗemɗe ngenndiije llggortooɓe sabi Alla, ɗii duuɓi kala ;
– Jannginde jaaynooɓe ɗemɗe ngenndiije binndol e taro ɗemɗe mum en ;
– Sosde catal ɗemɗe ngenndiije e nder Duɗal Ngenndiwal keblowal yuɓɓinooɓe laamu, jaaynooɓe e ñaawooɓe (ENAJM).
Nuwaasoot ñande 3 suwee 2021.
