Fedde sukaaɓe calgu yuɓɓiniino hiirde pinal ñande 14 abiril 2007 ɗo e Nuwaasoot to Galle Sukaaɓe Keso to. Hiirde nde noon, ɓe ndenndunoo ɗum ko e diɗɗe ɗiɗi Jabbaaji (« Rappeurs »), hono Raasiin Jah (RJ) e « PAKO » Leñol (Paco). Caggal nde gardiiɗo Goomu Pinal FSC udditi hiirde nde, bismi arɓe tawtoreede ɓee fof, hiirde nde fuɗɗorii ko yimre, tiitoonde mayre ko « AADA ». Ndeen yimre ina waɗi mogo, ina hollita kinɗe gonɗe e renndo fulɓe hono aynaaɓe, e remooɓe, e seernaaɓe, e awluɓe, e wammbaaɓe, e wayluɓe, ekn, gooto heen kala ardata ko e kuutorgal mum.
Caggal ɗuum ko jabbaaji njoli e dingiral he, yimre ɗiɗaɓere rewi heen, tiitoonde mayre ko NGOLLEN : nde hirjinta ko sukaaɓe Muritani yo ngummo ngolloo, sibu ɗum jonnde mehre nafataa. Jabbaaji « Pako Leñol », njoli ɓaawo ɗuum. Fawii heen ko tinndinoore wiyeteende ƊANNGAL. Hiirde nde uddiraa ko NGAMRI. Arnooɓe tawtoreede hiirde nde fof kootii ene mbeltii.
Jibi Alhuseyni Lam (F.S.C.)
