Yontere wootere caggal maayde Eli wul Muhammed Faal, ganndo sariya mawɗo, porfeseer to Duɗal jaaɓi Nuwaasoot ina wiyee wul Hormatalla, fellaama kural e hoore ñalnde aljumaa 12 mee 2017, tawi ina juuloya fajiri. O sankii ko ñalnde caggal nde doktoreeɓe Opitaal ndonki dartinde tuƴƴam hoore.
Wul Hormatalla ko neɗɗo kormaaɗo no feewi wonnoo, kormoraaɗo dewal mum Alla, ganndal mum, newaare mum, nuunɗal mum, mo almudɓe korsini haa ɗoon waawi haaɗde. Kanko Hormatalla o janngii sariya fotde duuɓi 14 deggondirɗi to jaaɓihaaɗtirde Muhammed V to Rabaa, to jaaɓihaaɗtirde Pierre Mendes France e to jaaɓihaaɗtirde Pantheon ASSAS ɗo o heɓiri Doktoraa Dowla ko faati e Sariya keeriiɗo, nder fannu sariya warkoyaagu e lewru suwee 1986. Hono ko wayi nii, ma a taw meeɗaa waɗde e leydi hee, so wardeede nii tan tawa anndaaka barɗo ɗum, tawi kadi ko jaggal mawngal. Yo Alla yurmo mo yaafoo mo, yo Alla haarnu mo aljanna.
