« Wuddere ɓaleere » walla mbiyen « gawu ɓaleewu » ko kullel asamaan, no Leydi men ndii nii, no koode ɗee nii, ko nokku weeyo ɗo hay huunde waawaa ɓoccitaade, wonaa ɓakdi, wonaa hay annoore. Wayi ko no gawu nii, pooɗoowo, ɓuucoo kala ko faandii ɗum. Ɗum noon, ko kuulel asamaan ngel nganndu-ɗaa, Alla e mum ñisde, Alla e ɓakdi mum tiɗɗaade, caasal ɓaaƴo mum ina waawi haɗde kala ko woni e mum ɓoccitaade, gila e ɓakdi haa e caafe, ko ɗe mbaawi wonde fof, yo won caafe jiyotooɗe ɗee (annoore…), walla caafe yiite-sulɗeeje (bempeƴƴe rajo ekn). Ɗum noon ko nokku niɓɓo, mo yiyotaako. Yeru, so en njiɗii waɗtude Leydi men ndii wuddere ɓaleere, maa mbaawen tiɗɗude ɓakdi mayri fof e nder faandu ndu wudduwol saatimeeteer gooto, woni tiɗɗen Leydi haa fotta e abbere gawri.
So neɗɗo yanii e nder wuddere ɓaleere, won ko tinata ?
Jaabawol Andrea Ghez : « O daɗataa. So tawii ko koyɗe maa ngidii naatde wuddere ɓaleere ndee, geɗel idotoongel kewde ko, sabu caasgol ɓaaƴo ngoo, aan fof, gila e koyɗe haa hoore, a silkitto. Ndeke hay huunde en tinataa, sibu en nattii woodde… en caayii, en ngontii ceŋle ɓakdi ɓurɗe famɗude ».
Bookara Aamadu Bah
