Yimɓe fof ine keɓtini kattanɗe mawɗe rawaandu to bannge yiytude laawol, hono kattanɗe jamminagol. Mbele ɗum ko goonga boom ? So tawii ko noon woori, hol geɗe gaddanooje ndu waawde maantaade nder weeyo mayru (sato mayru) ?
Jom dawaaɗi en e woɗɓe ine keewi jangtaade daari kaawniiɗi ɗo jawdi majjinondi yiyti nokku mum caggal nde majji ko juuti. Yeru, daarol ɗo dawaaɗi ɗiɗi e ullundu taccata yolnde 400 kiloomeeteer ngam yiytude joom mum en. Ko geɗe baaɗe nii gaddani annduɓe wiɗtude haa paama ɗee kattanɗe jamminagol.
Ine jooɗtoraa rawaandu ine jogii ko ɓuri kattanɗe jamminagol. Ine wiyee dawaaɗi ine njogii, nder ngaanndi mum en, natal (kartal) kala nokku ɗo keewi wonde walla rewde. Seerndi ɗeen nate e ɗe yimɓe ɗee, ko nate rawaandu tuugaaki tan e ko gite mayru njiyata koo, kono ine tuugii kadi e henndu ndu kine mayru ƴettata nduu, henndu nokkuuji ɗo ndu woowi, walla ɗo ndu meeɗi rewde. Geɗe keewɗe taariindi ine njaltina keneeli. So rawaandu susii leydi, andu waawi heɓtinde bolol, kono andu waawi kadi heɓtinde geɗe ndu woowi.
Won wiɗtooɓe mbiyi rawaandu ine jogii kadi maantorɗe goɗɗe, ko wonaa tan maantorɗe cohirɗe ɗee (repères sensoriels), ɗe ndu yahdinta e toɓɓe maantinɗe ndu resi he ngaandi mayru.
Mbele ko goonga dawaaɗi ine njogii “busol nderndero” ngam jamminoraade e maantoraade ?
Ine gasa tawa wonaa kartal cohirɗe ngal tan dawaaɗi njogii. E hitaande 2020 won wiɗtooɓe mbiyi dawaaɗi ine mbaawi huutoraade feere woɗnde wiyeteende “dogdu jamminoragol sulɗere” (course d’orientation magnétiŋue) ngam yiytude joom mum. Ɗum firti ko so rawaandu wemjii, ndu heewi ko yahde meeteruuji keewɗi takko bolol rewo-worgo ngam maantoraade ngesa sulɗere. Caggal ɗuum, ndu huutoroo ngel maandel ngam timmitoraade cohirɗe mum goɗɗe ɗee, hono hinere, ngam yiytude bolol mum.
Ɗum noon, rawaandu renndinta ko geɗe keewɗe, kartal ngaanndi e heɓtino-sulɗeewo, ngam yiytude bolol, hay so ko ngol juutngol. Kono kadi maleede fartaŋŋe ine jeyaa e daari ɗo rawaandu taccata capanɗe keewɗe kiloomeeteer ngam yiytude joom mum. So rawaandu huutoraaki henndu geɗe goowaaɗe, kattanɗe mayru jamminagol ine ustoo no feewi, ndu hawja balɗe keewɗe, walla jonte keewɗe tawa ndu banaaki henndu woodaandu…
Bookara Aamadu Bah
Ƴoogirde : internet
