Naamnal : Hol no njiyru-ɗaa feeto 47ɓo jeytaare leydi ndi hikka, waɗanaango ngootaagu ngenndi ndi?
Siidi wul Seek Abdallaahi (SWSA): Nde pellit-mi wonde kanndidaa nde, mi fellit kadi waɗde ngootaagu leydi kam e tiiɗtingol mahondiral renndo men ngoƴaaji am dowrowi e tuugnorgal am woote ngal kollit-mi ɓesngu Muritani. Mi huninooma ñawndude denndaangal doosiyeeji jowitiiɗi e ɗee geɗe, e dow nanondiral ngal nganndu-ɗaa kam tan waawi gaddaade nafooje dowrowe ngenndi ndi. Ndeke ko welemma mawɗo so tawii ngooɗoo feeto hawritii e uddugol ñalɗi diisnondiral ngam gartirgol mooliiɓe e ñawndugol bonanndeeji. Miɗo yetta heen Muritaninaaɓe kala sabu faayiida dañaaɗo e ɗiiɗoo ñalɗi, kam e hakilantaagal e muñondiral e ɓiyngu yummaagu teskaangu heen ngu. Miɗo hesɗitina ɗo pellital am jokkude ko fuɗɗaa heen ko haa ɓiɗɓe yummiraaɓe men mooliiɓe ɓee kala ngarta e leydi ndi, bonanndeeji ndañanee safaara e tuugaade e jamirooje diine men bagginɗo muñondiral e jaafondiral.
Naamnal : Hol no yimɓe mbaawirta nawdude jojjugol ndimaagu ngenndi ndi e julyultondiral aduna gonangal e mum ngal ?
SWSA : Julyutondiral leyɗe (mondialisation) ko fartaŋŋe, kono kadi ina waɗi geɗe ɗaɓɓuɗe darnde, haa teeŋti noon to bannge pinal. ɓaklitere waɗnde e nder fannu kumpital e jokkondiral addanii yimɓe waawde habrondirde e sahaa daɓɓo. Ɗum maa wallit caragol ganndal e pinal. Kono kadi eɗum ɗaɓɓi darnde ngam hisnude pine. Miɗo wasiyyoo nokkuuji kalfinaaɗi nehdi e jaŋde leydi ndi, mahadaraaji men, jaayɗe men, nde mballitta yontaaji garooji ɗi mbele ina mahoo e pine men e moƴƴi men Yoogaaɗi e tinndinooje diine Lislaam, woto jiriiɗe julyultondiral pine kaytinde ɗi. To bannge faggudu julyultondiral ina wallita njulaagu, yahngartaa kaalis. Ɗumɗoon noon ina ɗaɓɓi darnde ngam ƴellitde faggudu men haa waawaa fooɗtude kaalisaaji goɗɗi, ɗi alaa ɗo njeyaa, so wonaa ɗo mbaawi gollaade, njeñtina…
Naamnal : Hol ko gollaa e nder ɗii duuɓi capanɗe joy jeytaare ? Hol darnde fotnde dareede hannde ?
SWSA : Dañal men ɓurngal mawnude ko kisnugol ngootaagu leydi men, kam e kaɓɓagol ɓesngu men e koɗdigal mum, enen fof e taƴtude jolɗe muusɗe, tolsinɗe nguun ngootaagu e nder duuɓi noogaas cakkitti ɗi. Ko foti daraneede ko noon ina heewi : Idii fof cafrugol ñawanɗe jaɓɓugol ngootaagu ɓesngu men, mbele ina tiiɗta, ndiwten ko ɓenni. 9ellitaare faggudu woni geɗel ɗiɗmel ….
Naamnal : Muritani, hono no leyɗe goɗɗe ɗee nii, tinii no feewi caɗeele to bannge faggudu, caɗeele battinɗe e nguurndam ɓesngu ngu. Hol peeje cakkaaɗe ngam diwtude ɗee caɗeele ?
SWSA : Nde min ngari e laamu nde hawri ko ɓeydagol cogguuli petroŋ e gawri ɓurtungol e nder winndere nde… Ngam wallitde ɓesngu ngu, haa arti noon e ɓurɓe waasde ɓe, laamu ngu renndinii ko ina wona miliyaaruuji sappo (10) ugiyya, fotde 500 miliyoŋ ugiyya ngam haɗde ɓeydagol coggu mburu. Ko noon kadi gawri tuusaama huunde e yimɓe ɓurɓe hatojinde heen. Gawri nawaama nder gure leydi ndi, waɗaa e paabi ngam reentoraade caɗeele nguura …
Ƴoogirde : Ami Firo : Bookara Aamadu Bah
