Goomu kalfinaangu peccitagol e jiilgol ballal feewde e jaayɗe keeriiɗe Muritani, habrii, ñalnde 24/10/12, wonde wersanii jaayɗe ɗee taƴre adannde ballal laamu rokki 62 jaaynde e lowre internet, cuɓtanooɗe sabu mum en huuɓnude sardiiji ɗi goomu nguu lelnunoo caggal diisnondiral hakkunde ɓe ɗum toɗɗii ɓee.
Ndee ɗoo taƴre adannde ko 40 miliyoŋ ugiyya, bersaaɗi e konte banke jaayɗe ballitaaɗe ɗee, fotnde wallitoreede njoɓɗeele winndooɓe e hirjinde ɗum en waɗde heblooji ndernderi. Ina jeyaa e taƴre adannde kadi miliyoŋaaji 6 ugiyya ngam wallitde jaayɗe ɗee e piye gollotooɓe mum en ko Kees Kisal (CNSS) e 42 miliyoŋ bersaaɗi e konte Muulirde Ngenndi, mbele ina waawa ustande jąayɗe cuɓtaaɗe ɗee njoɓdi muulngo. Maa goomu nguu jokku golle mum, haa yoɓa taƴe keddiiɗe ɗee. Ender ɗuum, ma ɓe mbersan jaayɗe ɗee koo neeɓataa 50 miliyoŋ ngam wallitde ɗum en e coodgu kaɓirɗe e kuutorɗe jaayɗe. Goomu nguu habrii kadi maa sos ko neeɓaani njeenaari ngam hirjinde pentugol e keewal eddaaji nder jaaynirɗe.
Woni e goomu kalfinaangu jiilgol ballal ngal ko jonaaɗo HAPA e yonaaɓe 3 jaayɗe e jonaaɗo jaagorɗo kaalis, e nulaaɓe jaagorɗo kumpital.
Yoogirde : AMI Tesko : Fooyre Ɓamtaare ina jeyaa e jaayɗe pecciide e ngaal ballal.
