Ñalnde mawbaare 18 lewru yarkomaa hitaande 2022, ko sunaare huuɓtodinnde wonande leñol ngol, sabu ustaare gootal e jaale ɗemngal pulaar, hono Abdullaay Aali Jallo lollirɗo (Jalliis), jibinaaɗo e nder Mbooyo waalo he hitaande 1970. Ko ɗoon o naati jaŋde e duɗal tuubakiri, haa o heɓi won tolno, o yaaɓani Ndakaaru to o jokkoyi jaŋde makko hakkundeere to liisee Lamiin Gey. Ko e oon sahaa o felliti ɗaccude oon fannu, o ruttanii jaŋde pulaar haa o heɓi heen seedenteeje e kala tolno.
O heɓii jannginde duɗe pulaar e gure keewɗe, ko wayi no Nuwaasoot, Mbooyo e Yahre-laaw. Ko ɗoo pellital makko e ɗemmngal pulaar ɓeydii yaajde, o naati he gure Fuuta ngam wiɗtoyde jaraale gure, haa e waɗde jeewte gila e rajooji haa e kiirɗeeli. Ɗo o rewnoo fof, o yiɗnii heewɓe jaŋde pulaar, gila e almudɓe, haa e seeremɓe. Jeewte ɗe o waɗi e galleeji diine ɗum limtotaako.Ko o neɗɗo jankiniiɗo, laaɓɗo ɓernde, korsinɗo Pulaar haa woni goonga. Omo heewno wiyde e jimɗi makko « jaambaaro jaasataa leñol, jaɓat, jaɓana leñol, kala jamfotooɗo, jalkita leñol, oon jaasat jaasna leñol ». Jalliis jeyaa ko e yimɓe ɓurɓe anndude jaraale gure Fuuta, omo winndi heen deftere heewnde faayiida. En mbaawaa haalde nguurndam Jalliis tawa en kaalaani nguurndam hakkunde makko e Tijjaani Aan yiɗde mum e korsa mum e makko, ɓe ndewdi e fannuuji keewɗi to bannge ɗemngal pulaar. Tijjaani Aan ina wiyatnoo « so mi yiyaaka janngo, njaggee e Jalliis en e ko nanndi e makko, kala ko mbaaw-mi gollude e pulaar eɓe mbaawi gollude ko ɓuri ɗum ». Ko ñalnde njeslaare kikiiɗe 19 yarkoma 2022, genaale Mbooyo waalo jaɓɓii koɗo mum tedduɗo, ganndo mo ɗawataa ganndal mum
Ɓamtoowo pulaar mo aamataa, kaaloowo goonga mo mallataa. Kuɓɓuɗo duɗe nde ndoytataa. Heewɓe kawrii e wirwirnde makko, mbeefeegu yimɓe musiɗɓe e yahdiiɓe ummoriiɓe banngeeji fof, nduusi mo haa njettini mo e galle makko cakkitiiɗo. Kono jimɗi e jaraale kala njeewaama, yo Alla lomto lomtina, heɓɓitanoo en ndeeɗoo yolnde mettunde sukkude. Yo Geno yurmo mo, yaafoo mo, kanko e maayɓe juulɓe kala.
Kuɗol Mammadu Jah giɗo ngenndi pulaar,
kalfinaaɗo jaŋde catal Fonndu Jeeri.
