Ko faati e naatnugol jaŋde ɗemɗe ngenndiije he Duɗal Ngenndi ngal Njuɓɓudi laamu e Jaaynugol e Ñaawoore (ENAJM)
Jokkorde pelle pinal ngenndiije pulaar, sooninke e wolof (FƁPM, AMPLCS, APROLAWO) nanii, rewrude e jaayɗe, kurmbitgol, ñalnde alkamiisa 15 oktoobar 2020, tumbudu heblo he nder ɗemɗe ngenndiije wonande doge « ñaawoore » e « njuɓɓudi laamu », to Duɗal ngenndi ngal Njuɓɓudi laamu e Jaaynugol e Ñaawoore (ENAJM).
Pelle amen ɗee, sabu mum en wonde pelle-baafal hare ngam keɓtingol timmungol ɗemɗe men ngenndiije rewrude e laawɗingol mum en, e kuutoragol mum en he nder denndaangal fannuuji nguurndam leydi ndii, mbaawata tan ko weltaade e ndee feere, so janngingol ɗemɗe Pulaar, Sooninke e Wolof to ENAJM, ngam, e yeru, « kalfinaaɗo njuɓɓudi laamu ine waawaa haaldude, hunuko e nofru, e ɓiɗɗo leydi he nder ɗemngal ngal ɓuri nande ».
Kono tan, e miijo amen, ndee feere hesere ine luurondiri e hoore mum, sibu ko toɗɗii « kalfinaaɗo njuɓɓudi laamu » e « ñaawoowo » koo, ɓuri toɗɗaade kadi ko jannginoowo e cafroowo, kam e denndaangal mecce jowitiiɗe e mbaawka laamu. Ko ɗuum tagi, so en njiɗii ndee feere yettoo no moƴƴi faandaare mum toɓɓaande ndee, alaa-e-sago nde naatta e feere ɓurnde yaajde, so mbayliigu tippudi nehdi e jaŋde tuugiingu e janngingol ɗemɗe men ngenndiije ɗee kala, nde tuugoo e politik goonganteejo laawɗingol ɗemɗe Pulaar, Sooninke e Wolof.
Ko ndeen tan ENAJM e denndaangal juɓɓule jaŋde e heblo ngonata nokkuuji mahooji ngootaagu ngenndi, ɗi ngona kadi kuutorɗe baawɗe rokkude halfinaaɓe njuɓɓudi laamu ɓee, ñaawooɓe ɓee, e jaaynooɓe ɓee, e denndaangal fanniyankooɓe « geɗe ndenndaandi », gannde paatuɗe e ɗemɗe, e pinal e renndo, gaddanooje ɗum en waawde jokkondirde e yimɓe ɗo ɓe ngollotoo ɗoo, kam e waawde ardaade gardagol juumtungol.
Nuwaasoot ñalnde 20/10/2020
Jokkorde pelle pinal
