Wonande pulaar, ko heewi waɗaama, ko heewi ene heddii, nde wonnoo daawal ngal ene juuti. Ko ɗum yettere Allah, winndooɓe ene ngoodi, jannginooɓe ene ngoodi, janngooɓe ene ngoodi. Yeeyooɓe defte ne kay ene ngoodi. Ene jeyaa e ɓeen yeeyooɓe, musiɗɗo Demmba Jah, mo Ndulumaaji Demɓe. Maa won hannde duubi 28, ko ɗeen golle o waɗata hakkunde Senegaal e Muritani. Defte ɗe fannuuji ceerɗi, tolnooji ceerɗi, winndiyankooɓe heewɓe toowɓe gannde en. Duɗe Pulaar leyɗeele ɗee, batuuji mawɗi, otelaaji, dingire jeewte e naalankaagal, hoohooɓe fitiramgol1eeɓe, jannginooɓe, wiɗtiyankooɓe, almudɓe, terɗe laamu, julankooɓe, pelle koppe, pelle pine, pelle gure, jeeyirɗe, yimɓe heeriiɓe, ekn. njokkondirii e makko ngam soodde defte. Ene woodi e majje, defte pinal e coñce, taarik, hiisa, taro, caggitorɗe, defte diine, jaayɗe, puɗɗorde jaŋde, jaŋde mawɓe, kelmeendi, ekn. Ɗeeɗoo defte ko fuutankooɓe, ko fulɓe mbinndi ɗe, ko heewi heen muulaa ko Senegaal e Muritani. Ko ɗum waɗi, so ko tawii leñol ene yiɗi daɗde, alaa e sago winnda, jannga ɗemngal mum ƴellitoroo ɗum. E ndiin mbaadi, jokkondiral Jaaynde Fooyre Ɓamtaare e Demmba Jah, ko ballal Allah tigi, ko ɗum fartaŋŋe mawɗo ngam ko fuɗɗaa golleede koo anndee, saroo e winndere hee. Duubi 28 wonaa lebbi 28, wonaa kadi balɗe 28. Demba Jah, yo a ɓooy daranade bamtaare Pulaar.
Jokkorɗe Demmba Jah ko :
To senegaal: (00221) 775059905.
To Muritani: (00222) 41163566
Nuwaasot, ñalnde 29 suwee 2017.
