Lebbi tati caggal kuudetaa 6 ut, koleneluuji nulaama e nder leydi he ngam faamninde yimɓe ɓe sababuuji gadanɗi ɓe heɓtude laamu. E nder diiwanuuji he kala ɓe njuɓɓinii batuuji ngam denndinɗi hilifaaɓe nokkuuji ɗi ko wayi no ardiiɓe tirbiiji kam e foksineeruuji keedanɗi ɓe. Ko ɓuri maantinde e haala maɓɓe ko hollitde wonde caɗeele leydi ndi wondi ɗee kala saabii ɗum ko Siidi wul Sheeƴ Abdallaahi, walla wiyde wonde salii kuudetaa oo tan ko yimɓe wondunooɓe e laamuuji ɓennuɗi, walla forlunooɓe ngalu leydi.
Ɓe kollitii kadi wonde Muritaninaaɓe ɓeydiima wellitaade, nguurndam moƴƴitii gila militeeruuji ngarti e laamu he. Alaa ko waɗtetee e kaaɗoo haala, sibu ina wayi no ko kamɓe ngondunoo e Maawiyya duuɓi ardii leydi ndii kala, ɓe ngondi e Eli, ɓe ngondi e Siidi. Maa mbiyaa ma a taw wonaa e Muritaninaaɓe ɓe kaaldata. To bannge wellitaare ina teskaa wonde ko Siidi laamii ko alaa cokraaɗo miijo mum, tele e rajo, mikrooji ko udditanooɗi gooto kala ina haala ko welaa. Hannde eɗen nganndi ko woodi. Fenaande noon jogii ko koyɗe, kono alaa dote ko jooɗorii.
Bookara Aamadu Bah
