Miɗo seedtoo geɗe tati : miɗo seedtoo ɓiyngu yummiraagu hakkunde Senegaal e Muritani. Ut 86, hade goɗ- ɗum joltude, Sammba Hawoli o e Yero Dooro Jallo (yo Alla ɓuuɓan mo), nde Senegaal huccani » yonterre jaŋde mawɓe » ɗo ɓe ngari, nde wonoo ɓe mbaɗi ko ɓiyɓe yummiraaɓe maɓɓe ngoni ɗo, ɓe ngari wallinaade, ɓe njokkondiri e amen mbele amin njantondira e maɓɓe, min mballa ɓe e golle dook- ɗe ɗe, ɗe ngandu-ɗaa ina keewi doole, ɓe mbaawanaa ɗum en kamɓe tan. So ɓe ngarii gaayene, firti ko aɓe mbaɗtorii en. No ɓe ngardi ngolɗoo laawol, ɓe ngardi ngoltoo laawol, Muritaninaaɓe njahri toon nii, ɗum ɗoo ina teeŋtina no ɓe mbiyi koo naane nii e hanki fof : » fulɓe, ɓe Muritani e ɓe Senegaal fof njiydi yumma e baaba « . Miɗo seedtoo ɗuum.
Miɗo seedtoo golle leñol ngol waɗi, rewrude e Fedde Ɓamtaare Pulaar, gila nde metti nde, yimɓe ina cuuɗoo, haa yeeso muuɗum, haa ñallunge hannde nge, golle ɗe ina njaha, ina ɓeydoo, ustaaki, njahtiraani caggal, miɗo seedtoo ɗum, miɗo yanta e e seedtiiɓe. Miɗo seedtoo to bannge, no Mbay wiyri jooni nii, ɗemngal ngal hol ko nafti. Kanko Mbay oo, kanko Sih Abdullaay oo, kanko e Jaara kaalɗo hanki oo, nulaaɗo fedde sooninkooɓe, ko kamɓe ngadii jannginde ɗemɗe ngenndiije ɗe. Ina moƴƴi ɓe nganndee, ɓe mbaɗii heen golle jooɗ- ɗe.
Sukaaɓe waɗooɓe doktoraa mum en hannde ɓe, maa ɗum heɓɓe doktoraa mum en, ɓe puɗɗorii ko Pulaar, kamɓe ɓee njanngini ɗum en. Sukaaɓe ɗiɗo, ina njanngina duɗal am to, heen gooto ko Jah yettetee, hitaande wootere meeɗi waɗde e ekkol, goɗɗo o ko Bari, meeɗaa naatde ekkol ; kono ɓe njokkondirii e sanɗaaji, joom metiriis en ɓe kaalani ɗum en huunde to bannge ɗemɗiyankaagal, ɓeen paamaani ɗum e Farayse ; ɓe kaali ɗum e Pulaar, ɓe pacciri ɗum. Ɓe paamni ɓeen ko paamaano, ndaa kamɓe ko Pulaar oo tan ɓe njahri. So ɗum ɓennii, hanki, hannde, mbele eɗen poti woppude ko hanki ko njeebo-ɗen ɗum ? Alaa. Sibu leydi ɓurndi ƴellitaade to bannge karallaagal ko Sappoŋ (Japon). Hol leydi ɓurndi Sappoŋ haɓɓaade e hanki mum ? Ɓoodaani. Saponnaaɓe ina kaɓɓii e hanki mum en haa ko ɓuri alaa !! Tee geɗe hannde ɗe alaa ko ɓuri ɓe ƴellitaade heen.
Firti ko eɗen poti ruttanaade geɗe men hanki nafooje ɗe, sibu ko kañje ngoni ngooroondi.
