CIIMTOL JOKKONDIRAL SETEEJI DOWLA MURITANI E NGOOTAAGU OROP E JAAYNDEYANKOOƁE TO JONNDE JAAGORƊO GEƊE NDERNDERE
Fooyre Ɓamtaare bismaama e yeewtere nde jaaynirɗi ɗi noddaa yo tawtore ñande alkamiisa 28/06/07, ɗo e Nuwaasoot. Ɗum waɗnoo ko to jooɗorde Jaagorɗo Geɗe Nderndere (Ministère de l’Intérieur), e noddaandu seteeji ɗiɗi : sete Muritani e gardagol Njaay Kan, Ammbasadeer, Hooreejo Geɗe Orop e Amerik to Jaagorɗo Geɗe caggal e Ballondiral (Minist. des Affaires Etrangères et de la Coopération) ; e sete Orop e gardagol e M. Won Andreas Mettenheim, Hooreejo Goomu toowɗo toppitiiɗo Moolaare e Uujgol (Asile et Migration) mo Diiso Ngootaagu Orop (Conseil de l’Union Européenne), e Patrick Spirlet, ɓakiilu Ngootaagu Orop, e Jean-Eric PaRuet, Jooɗaniiɗo (Représentant) Ngootaagu Orop he Muritani.
Jokkondiral ngal feewtunoo ko e njillu Ngootaagu Orop e kaaldigal mum e Dowla Muritani e ko feewti e kuulal 13 Nanondiral Cotonou (Kotonu) e ko feewti e uujooji. Saanga waktuuji 18:30mn, Njaay Kan udditi jonnde nde, waɗi ciimtol ko seteeji ɗiɗi ngollii gila rawane feewde jooni, e ko nanondiri e dow mum. Caggal ɗum o hokki konngol sete Ngootaangu Orop o. Ɓeen ne ɓeydi huunde e ko o haali ko. Nde ɓe njoofni, naamne e ɓeyde jaayndeyankooɓe huccanaa. Ɓeen ne ndokki heen miijooji mum en, te naamnii seteeji ɗiɗi ɗi fof geɗe keewɗe : daartol golle ɗe e iwdi majje, so ɗum ardi maa alaa ko e maayɗeele sukaaɓe Afrik e nder Sahara, hono yiɗɓe yahde Orop ɓe ; hol ngartam nanondiral ngal feewde e Muritani ; hol batte majjum to bannge yowitaare leyɗeele Afrik baasɗe ɗe e leyɗeele Orop, ekon.
Seteeji ɗiɗi ɗi fof, caggal nde njaabii naamne ɗe fof, mbasiyii kala jiɗɗo luggiɗinaade heen yo rutto e Bayyinannde renndaande nde seteeji ɗi penñini ñande heen. Kala tawtoranooɗo yeewtere nde heɓii heen tummbitere. Ƴeew tonngaaka Bayyinannde nde (e tonngoode aroore).
E kuɗol Aamadu Umaar Jah Nulaaɗo FƁ
