Jowol rewo findii e belaa. Caggal nde ɓe companaa catal rajo Muritani 104.9 FM
Talaata 21 duujal (mee) 2024, Jowol Sahre udditanaama catal Rajo Muritani 104.9 FM. Ɗum kewi ko e gardagol jaagorgal kalfinaangal pinal, cukaagu e coftal ɓalli, Ahmed wul Siidi Ahmed wul Je, yantude e Gardo RajoMuritani, e Waalidiiwal Gorgol Ahmedna wul Sidebbe, haa e suɓaaɓe nokkuuji ɗii. Caggal jaɓɓungal paayodinngal ngal jowolnaaɓe njaɓɓii sete jaagorgal ngal e denngaangal hoɗɓe arnooɓe tawtoreede oon belaa. Ɓe ñaantiri beetawe oo ko cinkal jooɗngal, bawɗi e ngamri.
Ko hedde waktuuji 11 jaagorgal ngal ɓami konngol, o artii e ko woni sabaabu compugol ngoo rajo, so ƴellitde pine e aadaaji nokku oo, gila e wuro Jowol ngoo haa e gure taariiɗe ɗum ɗee. Sabu jowol ko wuro finaa tawaa ɓooyngo, renndinngo geɗe keewɗe, leppi, annduɓe e jaambareeɓe. Rajo ngoo maa wallit kadi hirjinde sukaaɓe to jaŋde e nehdi. Maa ngo wallit moƴƴinde koɗdigal hakkunde leƴƴi e kinɗe koɗduɗe. Haa jooni kadi, maa ngo ɗoftu remooɓe, awooɓe, e aynaaɓe haa e fitiram golle en. Ngam kadi wostondirde miijooji e sakkude peeje ɓamtaare.
Teeŋtinen tan, gaa gaa Rajo Jowol ngoo, jaagorgal hurmbiti ɗoon he Jowol, ko rajooji nay (4) : rajo Jowol, rajo Ayyuun, rajo Kobenni, yantude e Rajo Quraana Nuwaasoot.
Caggal ɗuum sete oo naati e huɓeere ndee ngam fawde yiytere he kaɓirɗe pattam-lame ɗe rajo ngoo yuɓɓiniraa ɗee. Nokkuuji ɗiɗi keblirɗi jeewte haa e birooji dow e les. Caggal ɗuum kadi, yeewtere adannde waɗaama he Pulaar e sooninke, tawi abbitii ko e holi no Jowolnaaɓe njaɓɓorii rajo ngoo ?
Jowol e saraaji mum fof ngeeraama nde ɓeydata tiiɗnaare mbele naftoroo fartaŋŋeeji puɗɗiiɗi heɓeede ɗii.
Caggal ɗuum, janngo mum, Jaagordu pinal nduu aafii haayre catal rajo Muritani to Baabaaɓe Looti ñalnde alarba 22 duujal 2024.
Daawuuda Sammba Ndonngo
